Kryeminsitri i vendit Edi Rama ka reaguar sërish përmes një statusi në facebook pas akuzave të shumta për miratimin e ligjit që lejon importin e mbetjeve. Ai shkruan se thjesht u rregullua industria e riciklimit dhe se nuk do të groposen dhe as nuk do të digjen plehra në Shqipëri.
Ai shkruan se shqiptarët nuk u tradhëtuan në vitin 2013 kur një tjetër ligj u anullua, dhe as në 2016-ën.
Ja postimi i Ramës:
Çfarë po u thuhet sot njerëzve nga sharlatanët politikë e mediatikë, për ligjin e ri të mbetjeve, është një shpifje që synon t’u fusë frikën dhe t’i përdorë kundër qeverisë! Ne nuk i kemi tradhëtuar shqiptarët kur ndaluam importin e plehrave nga jashtë; nuk i kemi tradhëtuar kur kaluam ligjin e ri që s’ka të bëjë gjëkundi me lejimin e importit për plehra që digjen apo groposen në Shqipëri; nuk do t’i tradhëtojmë kurrë për asnjë interes që bie ndesh me interesin e tyre e të fëmijëve tanë!
Ligji i ri është vetëm normalizimi i jetës për industrinë e lehtë të riciklimit, 100% sipas legjislacionit të gjelbër të BE-së, e cila blen mbetje letre, plastike, alumini apo druri dhe i kthen në lëndë të parë për prodhimin e ambalazheve, shisheve plastike, kanaçeve të aluminit apo material bio për ngrohje (pelet).
Ishim vendi i vetëm në Europë pa këtë ligj dhe sot jemi thjesht një vend si të tjerët, në rajonin tonë apo në Bashkimin Europian./a.m.
