Nismat e Ministrisë së Brendshme për të ashpërsuar dënimin e personave që arrestohen për veprat penale të armëmbajtjes pa leje, u cilësuan si antikushtetuese nga Gjykata. Kushtetuesja rrëzoi qeverinë për shtimin e masës së dënimit për rastet e mbajtjes pa leje të armëve dhe eksplozivit nga 5-8 vjet burgim dhe në rrethana cilësuese nga 15-20 vjet burgim, kur eksplozivi mbahet, transportohet për qëllime kriminale.
Ministri i Punëve të Brendshme, Saimir Tahiri reagoi sot për këtë çështje, duke e cilësuar vendimin e gjykatës si dekurajues. Megjithatë ministri theksoi se do të përgatiten amendamente të reja, për ta bërë të dënueshme armëmbajtjen. Ministri Tahiri tha se do të merren modele të ngjashme në botë dhe armëmbajtja në trup do quhet përgatitje për sulm.
Nisur nga situatat e rënda kriminale, që po kalonte vendi në fillimin e vitit 2014, qeveria do t’i drejtohej Kuvendit me një paketë të gjerë amendimesh në Kodin Penal, me qëllimin që të ndikonte në parandalimin e këtyre fenomeneve dhe rritjen e ndëshkueshmërisë për të gjithë shkelësit.
