Sikur të mos mjaftonin problemet dhe përplasjet politike në Shqipëri, Qeveria dhe Presidenca shqiptare duket se kanë zgjedhur edhe një shesh tjetër beteje, tashmë jashtë vendit, pikërisht në Strasburg. Qëndrimi ndaj Ligjit të Pronave është në qendër të kësaj përballje mes dy institucioneve më të larta në vend. Si Qeveria ashtu edhe Presidenca po bëjnë çmos të marrin mbështetje ndërkombëtare, ku qeveria po lobon që të marrë mbështetjen e Këshillit të Evropës për Ligjin e ri të Pronave, ndërsa Presidenti Bujar Nishani po lobon që ky institucion europian ta rrëzojë. Tashmë qartazi Strasburgu është shndërruar në një teatër përballjesh Qeveri- Presidencë. Dhe e gjitha kjo po zhvillohet kur pritet një përgjigje përfundimtare nga Gjykata Kushtetuese, e cila ende nuk ka vendosur për ditën e vendimit për pezullimin ose jo të ligjit të pronave.
Komiteti i Ministrave i Këshillit të Europës do të diskutojë në mbledhjen e radhës ligjin “Për trajtimin e pronës dhe përfundimin e procesit të kompensimit të pronave” në Shqipëri. Mbledhja do të zhvillohet këtë muaj në kuadër të mbrojtjes së të drejtave të njeriut. Pas ankimimit të Presidentit, më 23 shkurt të këtij viti ligji është dërguar për shqyrtim në Gjykatën Kushtetuese, edhe nga shoqatat të pronarëve dhe Partia Republikane, të cilat e kanë konsideruar si të papajtueshëm ligjin në fjalë me Kushtetutën. Në vendimin e parë të përkohshëm që mori Gjykata Kushtetuese në 22 prill, rrëzoi ankimin e këtyre të fundit, duke i dhënë të drejtë qeverisë, ndërsa vendimi përfundimtar pritet të merret brenda muajit shtator.
(javanews.al) Me. Ar
