Ku janë paratë e deputetit Mark Frroku? Kësaj pyetjeje Prokuroria e Tiranës po mundihet t’i japë përgjigje, ndërsa kanë nisur hetimet për milionerin gjeorgjiano-izraelit Amiran Dzanashvili.
Ky i fundit është blerës i kompanisë së basteve të deputetit Mark Frroku. Prokurorët kanë zbitur në terren dhe janë regjistruar dy procedime të ndara, ku po hetohet për akuzat e evazionit fiscal, mospagim tatimesh dhe taksash, falsifikim të dokumenteve dhe akuzën e “pastrimit të parave” në bashkëpunim.
Të gjitha këto vepra, sipas prokurorisë, biznesmeni i kazinove, hoteleve luksoze dhe aksioner i disa kompanive të naftës, dyshohet se i ka konsumuar në Shqipëri nga vitit 2013 e në vazhdim.
Për grupin hetimor, hyrja e tij në tregun e biznesit në Shqipëri dyshohet se ka patur si qëllim pastrimin e parave që kanë burime kriminale nga aktivitetet të ndryshme të paligjshme jashtë territorit shqiptar. Për hetuesit, kjo është edhe një nga pistat hetimore e dy dosjeve për të cilat po hetohet gjeorgjiano-izraelit Amiran Dzanashvili.
Ky hetim ka nisur pas arrestimit të biznesmenit në nëntor të vitit të kaluar në Rumani, si pjesë e një rrjeti të fuqishëm të shfrytëzimit dhe trafikut të femrave për prostitucion. Në pranga bashkë me Dzanashvilin kanë rënë edhe 22 persona të tjerë mes tyre biznesmene të kazionove dhe hoteleve luksoze në Rumani, të cilët dyshohen si pjesë e rrjetit të prostitucionit VIP në Bukuresht.
Investimi i tij i parë në Shqipëri ka qenë ai i datës 20 maj 2013 kur ka blerë fillimisht 20 % të aksioneve të ortakut të deputetit Mark Frroku në kompanine e basteve sportive. Disa muaj më vonë, Dzanashvili ka blerë edhe aksionet e tjera të kësaj kompanie duke u bërë pronar së bashku me një shtetas izraelit Ofer Nimrodi, i cili po hetohet për pastrim parash.
