Deputeti i PS dhe njëherësh kryetari i Komisionit të Ligjeve, Ulsi Manja ka reaguar lidhur me investigimin e gazetës amerikane “Mother Jones” e cila tregoi për lobimin rus në SHBA për kreun e PD Basha.
Përmes një deklarate për median Manja tha se kjo histori nuk mund të kalojë me ndonjë deklaratë të PD dhe i kërkoi Lulzim Bashës që të dalë dhe të japë shpjegime.
Më tej Manja thotë se Basha do të japë llogari para drejtësisë shqiptare, por edhe asaj amerikane.
“Kjo histori nuk mund të kalojë me ndonjë deklaratë të PD, pasi ne kërkojmë shpjegime publike nga Lulzim Basha. Kërkojmë shpjegime jo në emrin tonë, por të çdo shqiptari. Dje në mënyrë të paciptë, PD hidhte baltë ndaj Spiropalit, madje në ditën e 8 marsit.
Ne nuk i ndahemi kësaj historie pa marrë përgjigje. Lulzim mos u fshih, por duku, dil e jep përgjigje. Nesër për këtë histori do të përgjigjet para ligjit, këtu dhe rrezik edhe në Amerikë. Dje Basha gënjeu publikisht se nuk ka lidhje me kompanitë.
Në prag të fushatës, PD e drejtuar nga Basha lidhi dy kontrata në SHBA për të siguruar takime të nivelit të lartë në DASH, rreth një milionë dollarë për një foto me Presidentin Trump.
Pagesat u bënë përmes dy kontratave të lidhura në fund të marsit me 675 mijë dollarë.
Basha duhet të japë përgjigje shteruese, ose gënjen kompania lobuese ose gënjen Basha.
Ai duhet të mbajë jo vetëm përgjegjësi politike, por edhe penale, që t’i heqë damkën Shqipërisë për këtë turp kombëtar” tha Manja./a.m.
