Në ditët e fundit, kanë qarkulluar thashetheme nëse lideri çeçen Ramzan Kadyrov ka vdekur apo në koma.
Sipas mediave të huaja, disa raporte mediatike pohuan se ai po trajtohej në spital, pasi fotografitë e makinave që supozohet se tregonin automjete me targa çeçene në një spital në Moskë qarkulluan në kanalet ruse të Telegramit.
Por sipas postimit të fundit të Kadyrov në Telegram, ai është mirë dhe në fakt ishte duke vizituar xhaxhain e tij në Spitalin Qendror Klinik të Moskës.
Videoja e postuar në kanalin e tij sot tregon 46-vjeçarin ulur pranë një shtrati spitalor duke mbajtur dorën e xhaxhait të tij, Magomed Abdulkhamidovich Kadyrov, duke thënë se i moshuari “po shërohej nga sëmundja”.
“Unë jam gjallë dhe shëndoshë dhe nuk e kuptoj fare pse duhet bërë bujë edhe në rastin e sëmundjes sime. Tani publiku e di se cilat media dhe cilët persona gënjejnë hapur lexuesit e tyre”, ka shkruar ai në postim.
Kadyrov është një aleat i ngushtë i Vladimir Putin dhe komandon forca të gjera ushtarake në Çeçeni.
Megjithatë, ai shihej gjithashtu si një aleat i ish-udhëheqësit të Ëagner, Yevgeny Prigozhin dhe ndau disa nga kritikat e tij ndaj hierarkisë ushtarake ruse.
Ai e quajti vdekjen e Prigozhin një “humbje të madhe” dhe e përshkroi atë si “të dalluar” në një postim homazh në Telegramin e tij.
Raporte të tjera në internet pohuan se Kadyrov dyshohet se i është nënshtruar një transplanti të pasuksesshëm të veshkave.
/a.d
