Nis sezoni i provimeve për mjekët e rinj që duan të ushtrojnë profesionin e tyre. Pas një jave, në datën 7 maj startojnë testimet, fillimisht me ata që kanë përfunduar degën e mjekësisë, më pas farmacistët, stomatologët e deri te teknikët e laboratorit që përmbyllin sezonin e XIV të provimeve të shtetit, më 23 maj.
Qendra e Shërbimeve Arsimore ka shpallur dje kalendarin me datat bashkë me listën emërore për katër profesionistët e parë që do të futen në testim. Provimit të shtetit i nënshtrohen studentë që kanë përfunduar me sukses studimet bachelor dhe master në një nga degët e mjekësisë, e po ashtu kanë kryer dhe praktikën profesionale.
“Personi që kërkon të ushtrojë një profesion të rregulluar, duhet të ketë përfunduar programin përkatës të akredituar të studimit dhe/ose kualifikime profesionale në atë profesion, të cilat vërtetohen me dokumente zyrtare, të lëshuara brenda ose jashtë vendit dhe të njohura në Republikën e Shqipërisë, në përputhje me legjislacionin në fuqi”, përcaktohet në nenin 7 të ligjit “Për profesionet e rregulluara në Republikën e Shqipërisë”. Vetëm nëse e kalojnë me sukses këtë “filtër”, ata fitojnë licencën e ushtrimit të profesionit, që iu jep të drejtë të kërkojnë punë në një nga institucionet publike a private.
RREGULLAT E PROVIMIT
Qendra e Shërbimeve Arsimore ka përcaktuar datat e testimeve për nëntë profesionistë të shëndetësisë (përbri shkrimit). Në ditën e caktuar, kandidatët për mjekë duhet të paraqiten pranë QSHA-së (ishAKP), duke pasur me vete një mjet identifikimi bashkë me një kopje të tij, faturën e pagesës së tarifës së provimit për llogari të Agjencisë si dhe në rast ndryshimi të mbiemrit, certifikatën që e vërteton atë. Por më parë, ata duhet të verifikojnë në listë gjeneralitetet e tyre, pasi në rast mospërputhjeje, penalizohen në vijimësi.
“Për të gjithë kandidatët lutemi të verifikoni emrin, atësinë, mbiemrin si dhe datën dhe orën e provimit në faqen zyrtare të QSHA-së në adresën www.akp.gov.al, rubrika lista e kandidatëve. Në rast pasaktësie në të dhënat e paraqitura në ueb, lutemi të kontaktoni në adresën tonë si dhe të njoftoni përpara se të hyni në ambientet e provimit”, njofton QSHA. Gjatë procesit të testimit online, ata duhet të kenë parasysh disa rregulla të vendosura që në krye të herës: ndalimi i celularëve dhe përdorimi i tyre; komunikimi me kolegët dhe konsumi i duhanit apo çdo lloj gjëje tjetër në ambientet ku zhvillohet provimi. Prej kohësh, ata kanë në faqen zyrtare të AKP-së programet orientuese për secilin profil, ndërsa kanë në dispozicion edhe një fond pyetjesh, me të cilat mund të ushtrohen përpara se të futen në provim.
Provimi përmban pyetje me alternativa dhe quhet i kryer me sukses nëse kandidati siguron të paktën gjysmën e pikëve. Mbetësit kanë mundë- si ta rijapin provimin deri në pesë herë, me kushtin që sa herë ta përsërisë provimin të paguajë një shumë shtesë prej 2500 lekësh mbi tarifën fillestare që është 10 mijë lekë. Sipas rregullores së provimit, nëse një kandidat nuk paraqitet ose tërhiqet përpara fillimit të tij, provimi nuk vlerësohet i kryer dhe pagesa e kryer nuk i kthehet.
ma.me
