Afri 1 vit me pare kreu i Grupit Parlamentar Taulant Balla pa nga afër gjendjen e familjes së Lulzim Doskut në fshatin Dorëz. Së bashku me tre fëmijët, çifti jetonte në gjendje të mjerueshme, në një banesë e cila ishte tërësisht e shkatërruar.
Nën kujdesin e deputetit Balla dhe në bashkëpunim me sipërmarrjen dhe banorë të vetë fshatit, u bë e mundur që kësaj familjeje t’i ndërtohet një shtëpi e re me kushte normale jetese. Tashmë, në prag të vitit të ri, vetë kreu i Grupit Parlamentar ka shoqëruar familjen Dosku në shtëpinë e re, ku do të kenë mundësi të kalojnë festat e fundvitit.
“Në fillimin e këtij viti erdhëm në këtë familje, kushtet e së cilës ishin më të vështirat në krahasim edhe me familje të tjera që janë në vështirësi. Këtu, çfarë binte jashtë, hynte brenda; dimri kishte bërë punën e tij. Ne i dhamë fjalën që do të bashkoheshim të gjithë, me bashkinë, me shoqatat, me kontribues jo vetëm brenda Shqipërisë. Dua të falenderoj plot miq nga Maqedonia, nga Struga, të cilët mundësuan një pjesë të investimit; pjesa tjetër u mundësua nga shoqata këtu në vend e sipërmarrës, por edhe njerëz të thjeshtë e të zakonshëm të cilët u sensibilizuan nga pamjet që panë përmes TV.
Jemi në fund të vitit, ku dimri ka ardhur po aq i furishëm sa edhe vjet, por kjo familje do t’i gëzohet shtëpisë së re me kushte normale jetese. Unë jam shumë i gëzuar që tre fëmijët e kësaj familjeje janë përfitues të një banese, që u mundëson një jetë normale.
Vetë familjarët, e sidomos fëmijët u shprehën të emocionuar e të lumtur që më në fund do të jetojnë në një shtëpi të re e normale; nuk do të kenë më frikë nga dimri dhe i ftohti.
