Në Lezhë, shfaqet problematike situata e pastrimit të mbetjeve nëpër fshatra. Situata pranohet nga Kryebashkiaku i lezhës, që shpjegon se është si pasojë e përfundimit të kontratave të firmave që merren me pastrimin. Brenda janarit, tha Frrokaj, do jenë lidhur kontratat e reja.
Mbeturinat janë kthyer në një problem shqetësues në fshatrat e Lezhës. Mbetje që nuk pastrohen dhe kontenierë të dëmtuar apo dhe mungesë totale e tyre është panorama që të sërviret në shumë zona.
Problematika pranohet dhe nga Bashkia e Lezhës, ku vetë kryetari Fran Frrokaj thote se situata ka agravuar, pasi firmave të pastrimit u ka përfunduar kontrata prej muajsh.
Sipas tij kontratat e reja do të lidhen brenda muajit janar dhe mënyra e pastrimit do të jetë krejt ndryshe, ndërkohë që do të vendosen dhe kontenierë të rinj.
Fran Frrokaj: Është një problem që erdhi dhe u agravua në mënyrë të pakontrolluar për shkak të përfundimit të kontratave të vjetra që kishin me firmën e cila kishte pastrimin e Lezhës. Lezhën e kam ndarë në tre zona për pastrimin, një zonë Shëngjini dhe Lezha, në një zonë tjetër bregun e Matës dhe në një zonë tjetër zonën veriore që është një ndërmarrje e përbashkët me një pjesë të Bashkisë së Vaut të Dejës, me një ndërkomunale.
Jashtë kameras përfaqësues të Bashkisë së Lezhës, thonë se vonesat janë krijuar nga ankimimi i një prej firmave pastruese të përfshira në tender me pretendimin se Bashkia ka paraqitur kritere diskriminuese.oranews/a.k
