Ben Blushi ka njoftuar sot përmes një postimi në facebook se LIBRA është tashmë një parti ligjërisht e regjistruar në Gjykatën e Tiranës. Urime Blush! Ike nga Partia Socialiste duke akuzuar Edi Ramën se nuk bënte zgjedhje për Kryetar, por ti u zgjodhe Kryetar i partisë tënde me vendim gjykate.
Akuzove Edi Ramën dhe Partine Socialiste se referendumi nuk mjaftonte, por për të caktuar veten tënde Kryetar nuk iu drejtove as edhe një anëtarë të vetëm të partisë tënde. Ke krijuar një parti personale dhe shumë mirë ke bërë. Por të paktën, mos harro kaq shpejt ato çka ke thënë vetëm pak muaj më parë, për demokracinë e brendshme, për vlerat e bashkëjetesës në parti.
Sigurisht, tani me siguri do i bësh një palë zgjedhje edhe ti. Por do garosh përballe ndonjë fukarai nga pozita e Kryetarit të caktuar. E çfarë vlere do të kenë zgjedhjet për ty o Blush, tani që je kryetar i caktuar me vendim gjykate?
Me sa duket, gjithçka ke thënë paska qenë një gënjeshtër. Se ke patur hallin tek demokracia e brendshme në PS, por hallin e vërtetë e ke patur që të bëheshe pak Kryetar. E kur e pe që ne PS s’të vlerësonte askush, krijove partinë tënde dhe caktove veten kryetar.
Më mire i pari fshatit se i fundit i qytetit, apo jo? Po për t’iu kthyer demokracisë, të paktën në PS u organizua një referendum e ti që ishte kundër pate gjithë kohën e mundësinë për të shprehur mendimin tënd.
Tani do duhet të shohim demokracinë e brendshme në krijesën tënde LIBRA. Që veten e caktove kryetar me vendim gjykate, këtë e morëm vesh. Po tani, a do ketë ndonjë zë kundra brenda LIBRA-s ndaj këtij vendimi tënd arbitrar? Të shohim. /Lexo.al
