Komisioni Parlamentar i Ekonomisë dhe Financave rrëzoi të hënën nismën për lehtësimin e faturës së energjisë elektrike propozuar nga deputeti i Partisë Demokratike, Gert Bogdani.
Nisma përcaktonte vendosjen e një mase kilovatësh energjie elektrike, e cila do t’i jepet falas të gjitha familjeve apo individëve që klasifikohen si familje apo individë në nevojë dhe që përmbushin kriteret për të përfituar ndihmën ekonomike.
“Miratimi i këtij projektligji do të sjellë një ndryshim të rëndësishëm për sa i përket cilësisë së jetës për familjet dhe individët në nevojë”, tha deputeti Bogdani para komisionit. Sipas tij, për hartimin e nismës është marrë parasysh fakti që situata financiare në sistemin e shpërndarjes së energjisë elektrike (OSHEE) ka njohur një përmirësim të ndjeshëm dhe duke qenë se fatura financiare e këtij ligji është tërësisht e përballueshme.
Nga studimet e bëra nga grupi i punës që u mor me hartimin e kësaj nisme, rezultoi që sasia minimale ditore, me anë të së cilës një familje mund të përmbushë vetëm nevojat jetike janë 5 kW. Ky projektligj mbart efekte financiare totale në masën 12 miliard lekë, bazuar në llogaritjen e rreth 82 mijë familjeve në nevojë që përfitojnë aktualisht ndihmë ekonomike.
Por, maxhoranca argumentoi se një skemë e tillë do të sillte abuzime në hartimin e listave dhe përfituesve realë.
