Kauboi i Mesnatës kundër Demit të Tërbuar! Legjenda e Hollywoodit, Jon Voight, i është kundërvënë një tjetër legjende, Robert De Niro, për komentet që ky i fundit bëri për kandidatin republikan për president, Donald Trump.
Voight, i cili ka qenë përkrahës aktiv i republikanëve konservatorë, mbrojti Trumpin për komentet ndaj femrave, bërë më 2005, pa e ditur që mikrofoni që mbajti gjatë programit televiziv Access Hollywood ishte ende ndezur.
Trump dëgjohet tek i thotë drejtuesit të programit, Billy Bush, se ishte përpjekur të joshte një grua të martuar, drejtuesen televizive Nancy O’Dell, dhe se statusi prej personi të famshëm i jepte mundësi të bënte përpjekje me femrat.
Voight shkroi në Twitter se i vinte turp nga shpërthimi i De Niros, duke thënë se fjalët e Trumpit “nuk ishin aq të dëmshme sa shpërthimi i shëmtuar i DeNiros. Fjalët e Trumpit nuk dëmtuan njeri”.
Aktori, i cili është babai i Angelina Jolie, shkruan edhe se komentet e Trumpit nuk janë të ndryshme nga ato të meshkujve të tjerë që kërkojnë shoqërinë e femrave.
“Nuk njoh shumë burra që nuk janë shprehur me terma të ngjashëm seksualë kundër femrave, sidomos në vitet e rinisë”, shkruan Voight.
Pas publikimit të bisedës së Trump më 2005, ishte De Niro që shpërtheu në një video mesazh kundër kandidatit.
Teksa filmonte një video-testimonial politik për një grup jo-partizan të quajtur #VoteYourFuture, aktori legjendar u pyet si të gjithë pjesëmarrësit e tjerë se për çfarë shqetësohej.
De Niro tha se shqetësohej për drejtimin që kishte marrë vendi, duke shpërthyer në sharje për kandidatin republikan.
“Ai është komplet budalla. Është maskara, qen, derr, mashtrues, artist dokrrash. Një idiot që s’di çfarë flet”, thotë De Niro.
“Nuk i kryen detyrat, nuk do t’ia dijë, kujton se po luan kumar me vendin, nuk paguan taksat. Është idiot. Colin Powell e tha më mirë, ai është katastrofë kombëtare. Ai e vë vendin në siklet. Thotë se dëshiron të gjuajë njerëzit me grusht fytyrës. Epo, mua do të më pëlqente të gjuaja atë në fytyrë. Kështu e duam presidentin? Nuk e besoj. Çfarë më shqetëson është drejtimi i këtij vendi. Dhe jam shumë i shqetësuar se vendi mund të shkojë në drejtimin e gabuar me dikë si Donald Trump”.
