Ish-ylli i Manchester United, Paul Scholes, beson se klubi nga “Old Trafford” duhet të tentojë nënshkrimin me Mesut Ozil, për të shtuar më shumë kreativitet në mesfushë. Golat kanë qenë me pikatore për Manchester United, kohët e fundit, me “Djajtë e Kuq” që shënuan vetëm gjashtë të tillë në tetë sfidat e fundit të Premier League, pasi e hapën sezonin me humbjen 4-0 ndaj Chelsea.
Por, a mund të jetë përgjigjja për këtë situatë një mesfushor krijues klasik si Ozil, së fundi i ulur në stol tek Arsenali?
“Manchester United duhet të bëjë diçka për të marrë Ozil, i cili mund ta lidhë një ekip së bashku, – shpjegoi Scholes për “BT Sport”, pas fitores së ish-klubit të tij. – Ai është një lojtar që mund ta lidhë ekipin së bashku. Ozil ka cilësi të shkëlqyeshme, i ka treguar ato në karrierën e tij. Ai mund të jetë një përgjigje afatshkurtër, nuk e di. Mendoj se do të varet nga ai, në fund të fundit. Mesut është lloji i lojtarit, që mund t’i bënte shumë punë Manchester United”.
Ozil mbeti jashtë skuadrës së Arsenalit në ndeshjen e “Europa League”, të enjten. Paraqitja e tij e fundit konkurruese ndodhi më 24 shtator, në fitoren 5-0 të Arsenalit ndaj Nottingham Forest, në “Carabao Cup”. Turko-gjermani ka luajtur vetëm një ndeshje në Premier League, për sezonin 2019-2020.
/a.r
