Deputeti i Partisë Demokratike, Ervin Salianji thotë se është gati të lërë funksionet në PD, por edhe mandatin e deputetit me qëllim që kjo forcë politike të bashkohet.
Salianji u shpreh se i vetmi që i intereson përçarja në PD është kryeministri Edi Rama duke shtuar se sot të marrësh vendime për interesa personale dëmton Partinë Demokratike.
“Unë jam gati personalisht, nëse jepet një variant i caktuar për të bashkuar Partinë Demokratike, jo funksionin si nënkryetar grupi, por jam i gatshëm të lë mandatin për tu bashkuar PD. Të dalësh të marrësh përgjegjësi të caktuara, të diskutosh me kolegë dhe të hysh në përplasjet apo sulmet që bëhen nga qeveria për të parecarë PD nuk është privilegj. Është një kosto e caktuar, por ka disa njerëz që duhet ta bëjnë këtë. Ose ndryshe të dalin në protesta të dhe të rrëzojnë qeverinë”, tha Salianji në emisionin “Kjo Javë” në News24.
Deputeti demokrat teksa komentoi përjashtimin e 4 deputetëve të PD nga Grupi Parlamentar tha se ishte një ndërhyrje brutale nga ana e Alibeajt, në një kohë që deputetët kishin ndërmarrë një nismë për t’u bashkuar.
“PD ka nevojë për bashkim, për përthithjen e çdo individi dhe nuk ka luksin të përjashtojë deputetë. Ka nisur një përpjekje për bashkim nga një grup kolegësh të cilët nisur nga situata që është e pafavorshme, por edhe situata e zgjedhjeve që po afrojnë është bërë përpjekje për të gjetur rrugë si mund të bashkohet.
Në kushtet kur dëgjohet se ka një përpjekje për bashkim vjen një njoftim që thuhet se përjashtohen 4 deputetë të PD. Është një ndërhyrje brutale në përpjekjet për të qetësuar ujërat”, tha nder te tjera Salianji.
Pyetje: Si nisi dhe kush e propozoi shkarkimin e Alibeajt?
Salianji: Këtu nuk bëhet fjalë për tu shkarkuar dikush. Kjo është një mendësi bizantine që për fat të keq ndodh në krahun e Alibeajt. Ne po shikojmë opsione për tu bashkuar. Nuk është arritur që të flitet me të gjithë kolegët sepse ndodhi kjo ndërhyrja brutale.
PD nëse do kishte çështje për shkarkime do ta kishte ndërmarre këtë veprim. Ne do bëjmë çdo përpjekje konsensuale për tu bashkuar.
Unë po them që do ti japim kohën çdo deputeti për të arritur në një bashkim. Kanë qenë një grup deputetësh për të arritur një bashkim për të pasur mundësinë që grupi parlamentar mos keqpërdoret për luftëra të brendshme./m.j
