LDK duket se po kërkon më shumë pushtet në Qeveri. Aty, tashmë janë shtuar zërat për riformatim rrënjësor të Qeverisë, e jo thjesht emërime të reja të PDK-së në poste që la zbrazët Hashim Thaçi. Gjithçka vendoset nesër në mbledhjen e Kryesia së LDK-së.
Lidhja Demokratike e Kosovës duket se përfundimisht nesër do të sqarojë pozicionin e saj; nëse do të vazhdojë të jetë patericë e Partisë Demokratike të Kosovës në Qeveri apo do të rikthehet në lavdinë e “periudhës rugoviane”, kanë thënë burime të Gazetës Express.
Lidhja Demokratike duket se po vlon nga debatet e brendshme për shkak të pozicionit të saj të dobët në Qeveri, pavarësisht se Kryetari i saj është njëherësh edhe Kryeministër i vendit.
Burime të Gazetës Express thonë se në mbledhjen e nesërme të Kryesisë së LDK’së që mbahet pasdite do t’i jepet përgjigje shumë dilemave.
“Nesër është mbledhja e Kryesisë ku duhet të diskutohet për ndryshimet në Qeveri, pas lëvizjeve që ka ndodhur muajin e kaluar”, ka thënë një zyrtar i lartë i LDK’së në kushte anonimiteti për Express, të enjten.
“Aty do të propozohen ndryshime rrënjësore”, ka shtuar ai. Sipas këtij zyrtari, ndryshimet rrënjësore janë edhe kërkesë e partnerëve ndërkombëtar. Deri tani, është menduar se duhet thjesht të zyrtarizohen emrat e PDK’së në Qeveri; pra emërimi i Ministrit të Jashtëm dhe Zëvendëskryeministrit. Por duket se në LDK këtë proces e shohin si mundësi për të marrë më shumë pushtet në Qeveri.
