Sipas Xhafer Tahirit të LDK-së, askush nuk ka të drejtë të negociojë me Serbinë, para se vendi të hyjë edhe një herë në zgjedhje dhe që qytetarët të thonë fjalën e tyre edhe për dialogun.
Në Interaktiv të KTV-së, kryetari i Vushtrrisë ka thënë se koalicioni aktual ka “okupuar” pozitat. Sipas tij, “dështimi për liberalizim, përkeqësimi i ekonomisë dhe mungesa e perspektivës e bëjnë të domosdoshëm kërkesën për zgjedhje të parakohshme”.
“Askush s’ka të drejtë të negociojë para se të dalë qartë para qytetarëve se ky është qëndrimi jonë e qytetarët të votojnë krahas qëndrimeve për ekonominë, për sundimin e ligjit e edhe për qëndrimin e dialogut”, ka thënë ai. “T’i kthehemi qytetarit e të vendos ai se kush duhet të udhëheqë”.Sa i përket mundësisë së përfshirjes së LDK-së në dialog, Tahiri ka thënë se LDK-ja tashmë ka bërë të qartë qëndrimin për dialogun, se duhet patjetër që vendi të hyjë në zgjedhje për të marrë besimin e qytetarëve.
Duke folur për sondazhin e fundit, të porositur nga VV-ja, që nxori LDK-në si të parën në vend e Albin Kurtin më të preferuarin për kryeministër, Tahiri ka thënë se “nuk mund të pritet që VV-ja të nxjerrë LDK-në edhe si parti edhe si lider në vend të parë”. Ka thënë se diferenca mes LDK-së dhe partive tjera do të rritet deri në kohën e zgjedhjeve.
Ai ka thënë se thirrjet e SHBA-së që është periudhë vendimtare për dialogun janë që të bëhet unifikimi i politikës në vend sepse “tre krerët e institucioneve flasin me zë të ndryshëm”.
Akuzat e zëvendëskryeministrit Dardan Gashi se LDK-ja po funksionon si degë e VV-së, Tahiri i ka quajtur të parëndësishme.“Kush është Dardan Gashi për të kritikuar LDK-në? Kur ka dalë Dardan Gashi të marrë besimin e qytetarëve. LDK-ja nuk i shërben as Kadri Veselit, Dardan Gashit as Fatmir Limajt as askujt, pos interesit të qytetarëve të Kosovës”, ka thënë ai.
Duke folur për zgjedhjet e brendshme të LDK-së, Tahiri ka thënë se kjo parti do të ruajë unitetin dhe pret që partia të reflektojë në bazë të besimit të qytetarëve për anëtarët e partisë. (b.an)
