Një tjetër person ka rënë në pranga nga Policia e Shtetit në aksionin e ndërmarrë në Lazarat, ku mbeti i vrarë efektivi i RENEA-s Ibrahim Basha si dhe u plagosën dy të tjerë. Uniformat blu kanë arrestuar Dritan Shurdhin i dyshuar si porositësi i vrajses së oficerit të RENEA-s.
Ai është vëllai i Sabri Shurdhit, të vrarë në vitin 2007 gjatë një aksioni të RENEA-s. Ndalimi i Dritan Shurdhit ka ardhur pasi pista kryesore e hetimeve për sulmin ndaj forcave RENEA ku mbeti i vrarë Ibrahim Basha është hakmarrja për vrasjen e Sabri Shurdhit.
Efektivë të forcave speciale, por edhe ish-efektivë të këtij reparti, kanë pasur informacione edhe më parë që vëllai tjetër i Sabri Shurdhit, që aktualisht ndodhet në burg, Florian Shurdhi, po organizonte hakmarrjen për vrasjen e të vëllait më 7 shtator të 8 viteve më parë.
Aksioni në Lazarat vijon në ditën e katërt të tij, ndërsa në kërkim janë ende tre më të rrezikshmit Bervin Basho dhe dy vëllezërit Arbion Aliko dhe Alban Aliko.
