Avokati i Mikael Shumaher ka deklaruar para një gjykate në Gjermani se ish-piloti i Formula 1 nuk është në gjendje të ecë. Familja e Shumaher ka hedhur në gjyq revistën gjermane “Bunte” e cila kishte publikuar një artikull rreth tij, në të cilin shkruhej se 7 herë kampion i botës në garat me makina ishte në gjendje të hidhte disa hapa i vetëm, sipas deklaratave të një miku të familjes emri i të cilit nuk bëhej i ditur.
Shumaher kaloi 6 muaj në koma pas një aksidenti me ski në dhjetorin e vitit 2013 dhe që atëherë, shumë pak informacione janë dhënë rreth gjendjes së tij, pasi familja po mundohet në çdo mënyrë që të ruajë privatësinë.
Avokati Feliks Dam tha para gjykatës “ai nuk mund të ecë” ndërsa saktësoi se nuk mund të ngrihej në këmbë as me asistencën e terapistëve të shumtë të punësuar nga familja.
Revista gjermane në dhjetor publikoi një foto të Shumaher në faqen e parë me titullin “Ai mund të ecë përsëri”. “Mikael është shumë i dobët”, theksonte miku i familjes. “Por ai mund të ecë përsëri falë ndihmës së terapistëve. Ai mund të hedhë dy-tre hapa, ai edhe mund të ngrejë lart krahun”.
Ky artikull u cilësua si “i papërgjegjshëm” nga menaxherja e Shumaher, Sabine Kehm. “Fatkeqësisht, ne duhet të saktësojmë pas një publikimi të fundit se pohimi që Mikael mund të ecë përsëri është i pavërtetë. Ky spekulim është i papërgjegjshëm, pasi duke marrë në konsideratë seriozitetin e dëmtimeve të tij, i jepen shpresa të kota shumë njerëzve të përfshirë”, theksoi ajo./Panorama/a.m.
