Pas pezullimit të mësimit në qarqet Tiranë, Durrës dhe Elbasan, të nesërmen procesi mësimor do të vazhdojë normalisht.
Në një deklaratë për shtyp, ministrja e Arsimit, Besa Shahini deklaroi se të martën, në orën e parë nxënësve do t’u prezantohet një video informuese përsa u përket tërmeteve.
“Bëj me dije se dita e sotme e pushimit për nxënësit e zonave në fjalë, do të zëvendësohet në të ardhmen me një ditë tjetër. E deklarova edhe dje, mësimi rifillon nesër me shfaqjen e një videoje informuese të ndërtuar nga “Save the Children” në lidhje me masat që duhen ndërmarrë në rast tërmeti. Është video e animuar me disa personazhe fëmijë që kujdesen për veten në rast tërmeti. Katër gjërat kryesore që i mësojmë nga kjo video“, u shpreh ajo.
Në një dalje për mediat, teksa lajmëroi nisjen e mësimit ditën e nesërme, ministrja e Arsimit, Besa Shahini ceku edhe temën e lajmit të rremë rreth një tërmeti të fuqishëm, që panikosi mbrëmë shqiptarët.
“Unë gjej rastin të dënoj edhe një rast të paprecedentë, atë të mbrëmjes së djeshme të përhapjes së një lajmi të rremë “parashikues” të një tërmeti tjetër, i cili shtoi më tepër panikun e ankthin te njerëzit! Organet e drejtësisë po merren me ata që publikuan lajmin e rremë, ngaqë njoftimet e rreme që përhapin panik janë të dënueshme me ligj. Ajo që duhet të mbajmë në mend është se TËRMETET NUK MUND TE PARASHIKOHEN ASNJËHERË! – ndaj lajme të tilla në të ardhmen, ju lutem mos t’i merrni seriozisht. Rasti i mbrëmshëm na dha sinjal të fortë neve si Ministri e Arsimit, Sportit dhe Rinisë që duhet urgjentisht të ndërtojmë kurrikulat për edukimin mediatik të nxënësve, në mënyrë që t’i pajisim ata me informacione se si të bëhet dallimi i një lajmi të rremë nga një lajm i vërtetë”, u shpreh ajo.
g,kosovari
