Këshilli i Lartë i Drejtësisë ka vendosur që të pranojë kërkesën e Prokurorisë së Përgjithshme për të miratuar masën e arrestit ndaj gjyqtarit të akuzuar për korrupsion Ibrahim Hoxha. KLD ka vendosur që gjyqtari Hoxha të pezullohet nga detyra e tij derisa çështja gjyqësore kundër tij të përfundojë.
Hoxha u prangos pasi hetohej prej muajsh për akuzën e korrupsionit e mitmarrjes në vlerën e 600 mijë lekëve në këmbim të një vendimi gjyqësor.
Ja njoftimi zyrtar i KLD-së
Këshilli i Lartë i Drejtësisë, në respekt të plotë të Kushtetutës së Republikës dhe të ligjit nr. 8811, datë 17.05.2001 “Për organizimin dhe funksionimin e Këshillit të Lartë të Drejtësisë”, zhvilloi sot, datë 03.05.2016, një mbledhje të jashtëzakonshme, ku vendosi të miratojë kërkesën e Prokurorit të Përgjithshëm nr.1458/2 Prot., datë 03.05.2016 për dhënie autorizimi për caktimin e masës së sigurimit personal ndaj gjyqtarit të Gjykatës së Rrethit Gjyqësor Tiranë I.H. si dhe pezullimin nga detyra, derisa çështja penale ndaj tij të përfundojë me vendim gjyqësor i formës së prerë
