Emisari i Bashkimit Europian, Miroslav Lajçak ka nisur edhe një përpjekjet për çtensionimin e raporteve mes Kosovës dhe Serbisë. Të martën ishte në Prishtinë ku takoi fillimisht presidenten Osmani dhe më pas kryeministrin Kurti, pas takimit 2 orësh me të cilin tha se po diskutohet për hapat që do të ndiqen.
“Ka një dakordim për 3 pikat që duhet të ndiqen për de-përshkallëzimin e situatës: çtensionim, zgjedhje të reja dhe kthim në normalizim. Mirëpo, duhet që ende të diskutojmë për hapat konkretë”.
Ndërsa shqetësim i kryeministrit Kurti kanë qenë masat ndëshkuese të BE-së ndaj Kosovës të cilat ai i ka konsideruar në takim si të padrejta. Por Lajçak thotë se masa mund të ketë edhe për Serbinë.
“BE-ja e ka bërë të qartë se ka sanksione të gatshme edhe për Serbinë, që do të zbatohen nëse kuptohet se Serbia s’po vepron me kërkesat e BE-së. Është vendim i vendeve anëtare. Dëshira ime është të mos kemi sanksione ndaj Kosovës e Serbisë. Dëshira ime është të mos kemi sanksione e të kemi dyja palët në Bruksel e të negociojnë si të zbatojnë marrëveshjet”.
Më herët Osmani dhe Kurti pritën kryeministrat e Holandës dhe Luksemburgut. Porosia e tyre ishte që palët t’i përmbahen udhërrëfyesit të Bashkimit Evropian.
“Nuk e di nëse duhet ta drejtojmë gishtin te fajtori, te Kosova ose Serbia, sepse kjo nuk e ndihmon situatën. Ne dëshirojmë të jemi ndihmues. Besoj që çështja më kryesore dhe më e drejtë është që t’i përmbahemi udhërrëfyesit dhe planit”, tha Kryeministri i Holandës, Mark Rutte.
“Ne jemi këtu për të dëgjuar dhe jo gjykuar. Lufta e parë e botës ka nisur këtu, lufta e fundi në ish-Jugosllavi ka nisur këtu, duhet të largojmë çdo mundësi për të nisur kriza. Është me rëndësi që të dyja palët të besojnë në punën e BE-së dhe duhet të kemi dialog të hapur. Gjyshi im është hebre, unë jam gey, jam i martuar me një mashkull. Nëse do të jetoja në një shtet tjetër do të isha i dënuar më vdekje, por tani qëndroj para jush dhe flas për këto vlera, vlerat e paqes”, tha Kryeministri i Luksemburgut, Xavier Bettel.
“Demokracitë solidarizohen me njëra tjetrën përballë autokracive andaj edhe progresi demokratik i Kosovës është mundësi jo vetëm për shtetin tonë, por edhe BE-në për të shtyrë përpara reformat dhe transformimin e Ballkanit Perëndimor”, u shpreh Kurti.
Dy kryeministrat kanë vazhduar takimet me përfaqësues të shoqërisë civile.
/a.r
