Kryeministria ka reaguar pas deklaratave të Partisë Demokratike se Kryeministri ka dhënë një leje për ndërtimin e një objekti në bregdetin e Golemit, duke prishur kështu ambientet sportive në kompleksin turistik të njohur si “Laguna Blu”. Sipas portalit të qeverisë Transparenca.al, Kryeministri nuk ka dhënë asnjë leje ndërtimi, dhe se leja e dhënë rezulton të jetë nga komuna, e cila është miratuar nga Ish kryeministri Berisha.
Më poshtë sqarimi i kabinetit qeveritar:
Kryeministri Edi Rama dhe Këshilli Kombëtar i Territorit nuk kane asnjë lidhje me ndonjë leje ndërtimi në të ashtuquajturën Laguna Blu. Leja e dhënë nga komuna rezulton të jetë dhënë mbi një truall pronë private, mbi bazën e studimit urbanistik te zonës në fjalë, miratuar nga Këshilli Kombëtar i Rregullimit të Territorit, nën drejtimin e kryeministrit të kohës Sali Berisha.
Gjithashtu, vendimmarrjet e ndryshme të KKT-së, lidhur me bllokimin e lejeve të ndërtimit në qytetet apo në zonat e mbrojtura, në kuadrin e vendosjes së rendit ligjor mbi territorin, as nuk kanë lidhje me zonën në fjalë, as nuk kanë cenuar ndonjëherë të drejtën e njësive vendore për të dhënë leje ndërtimi për njësi familjare banimi dhe/ose turistike, mbi bazën e studimeve urbanistike të miratuara.
