Konsiderohej një mision i pamundur kthimi i rezultatit të ndeshjes së parë në Norvegji, ku Laçi u mposht 3-0 nga Molde dhe në fakt i tillë rezultoi.
Kurbinasit nuk patën forcën e duhur për të përballuar këtë kundërshtar, duke u mposhtur 0-2 edhe në sfidën e zhvilluar në Laç, për t’i thënë lamtumirë kompeticionit.
Skuadra e drejtuar nga ish-sulmuesi i Manchester United, Ole Gunnar Solskjaer e hipotekoi kualifikimin që në pjesën e parë, që u mbyll 0-2.
Marko Radas u tregua i pakujdesshëm në ndërhyrje në minutën e 41-të, duke shkaktuar një 11-metërsh që u shndërrua në gol nga Aursnes.
Goditjet përfundimtare kurbinasit e morën në shtesën e pjesës së parë, kur Strand përfitoi nga pasiguria e mbrojtjes, duke e detyruar Selmanin që nxirrte për herë të dytë topin nga rrjeta.
Në pjesën e dytë skuadra e Besnik Prengës, u mundua të bënte diçka më shumë në fazën sulmuese, por e kishte të vështirë të shënonte qoftë golin e nderit.
Laçi u eliminua me rezultat të përgjithshëm 5-0 nga Molde, por përtej zhgënjimit në raundit e dytë kualifikues të Europa League-s kjo eksperiencë e Laçit ishte mjaft pozitive, pasi mundi të eliminonte në raundit e parë Anorthosis Famagusta të Qipros.
/b.d
