Janë të dyshuar si personat që kthyen biznesin e fasonerisë në laborator modern droge në Vlush të Skraparit, Gjykata e Krimeve të Rënda cakton masën e sigurisë “arrest me burg” për administratoren Edlira Lame dhe Muhamet Kadiun.
Dhjetë ditë para zbulimit të laboratorit të kanabisit, uniformat blu mundën të zbulojnë një sasi prej 1.2 ton drogë në fshatin Lapan në afërsi të Vlushit po në qarkun e Skraparit.
Operacioni nuk u ndal por me metoda speciale, përfshirë përgjimet dhe vëzhgimet me forca operacionale në terren u arrit të zbulohej baza e tharjes së bimës narkotike.
Në momentin e ndërhyrjes siç dhe shihni në këtë foto, Lame dhe Kadiu ishin angazhuar të largonin nga magazina pajisjet e laboratorit të tharjes, por më pas ata u prangosën në flagrancë.
Para togave të zeza ata mohuan akuzat e përfshirjes në rrjetin e narkotikëve, por sipas Prokurorisë ata janë të përfshirë dhe këtë aktivitet dyshohet se e kryenin prej 3 vitesh.
Zbulimi i bazës së Kanabisit fillimisht me 1.2 ton të magazinuar në një ish- depo ushtarake në Lapan e më pas laboratorit të tharjes e paketimit në Vlush solli dhe furtunën në komisariatin e policisë së Beratit.
Një ditë më parë numri dy i policisë së shtetit bëri publik dhe masat ndaj policëve ku pati shkarkimi dhe pezullime nga detyra./shqiptarja.com
c.a
