Komiteti i Zhvillimit të Rajoneve në mbledhjen e fundit miratoi financimin e 33 projekteve të infrastrukturës vendore dhe rajonale të hartuara nga bashkitë, me një vlerë financimi 3.5 miliard lekë, për vitin 2017 – 2018.
Projektet e propozuara për financim përfshijnë vijimin e ndërhyrjes në disa qendra/sheshe qyteti, si: Malësia e Madhe, Bajram Curri, Përrenjas, Këlcyrë, Konispol); bulevarde/pedonale/parqe urbane në qytete (Elbasan, Korcë etj.); rehabilitime urbane (Tropojë, Belsh, Lushnje, Vlorë, Durrës, etj.); apo projekte të konektivitetit lokal dhe rajonal (Vau i Dejës, Kavajë, Shijak, Rrogozhinë, Elbasan, Fier, Divjakë, Polican, Himarë, Dropull etj.).
Një prej projekteve të mbështetura fianciarisht nga Fondi i Zhvillimit të Rajoneve është ndërhyrja polifunksionale në lagjen “Xhevdet Nepravishta”, në qytetin e Lushnjes. Projektin e ri me vlerë 140 milion lekë, për të cilin do të nisë puna së shpejti, Ministrja e Zhvillimit Urban, Eglantina Gjermeni e prezantoi gjatë takimit me banorë të lagjes “Xhevdes Nepravishta”, shoqëruar nga kryebashkiaku i Lushnjes, Fatos Tushe.
“Lagja juaj, e ndërtuar në një terren kodrinor prej vitesh ka patur probleme me përket rrëshqitjeve të dheut, disiplinimit të ujërave dhe përmbytjeve sidomos të kateve të para të banimit gjatë periudhës së shirave. Në këtë lagje nuk është investuar që prej ndërtimit të këtyre pallateve dhe paraqitet tashmë në gjendje tepër të amortizuar. Projekti që ne kemi miratuar do të zgjidhë problemet e rrëshqitjes së dherave, disiplinimit të ujërave dhe përmbytjeve të kateve të para të banimit në periudhën e shirave”, tha Ministrja Gjermeni në takimin me banorët.
Përfitues të drejtpërdejtë të këtij projekti do të jenë 4000 banorë si edhe të gjitha bizneset që ushtrojnë aktivitetin e tyre në zonë.
Punimet do të konsistojnë në sistemimin e kanalit të ujërave të larta, me pastrim dhe shtimin e gjelbërimit në bankinën e tij, ndërtimin e mureve mbajtëse për të penguar rrëshqitjen, shtimin e pemëve dhe gjelbërimit, ndriçimin në gjithë zonën që trajton projekti, plotësimin e infrastrukturës rrugore midis pallateve, punime trotuaresh si dhe krijimin e amienteve sportive e shlodhëse për të gjitha moshat.
Bashkia Lushnje, u mbështet në mbledhjen e KZHR edhe për projektin e sistemim- asfaltimit të rrugës Bubullim Imsht, me vlere 78,346,951 Leke si edhe për rikonstruksionin e 3 shkollave 9 vjecare, palestrave dhe ambjenteve sportive, 2 prej të cilave në Fier Shegan dhe tjetra në Krutje.
Që prej vitit 2014 e deri më sot janë 400 projekte të infrastrukturës vendore nga veriu në jug, nga bashkitë e mëdha e deri tek ato më të voglat, të cilat po financohen dhe zbatohen përmes Fondit për Zhvillimin e Rajoneve, një instrument financiar tashmë tërësisht i riformatuar për t’i dhënë frymëmarrje zbatimit të çdo projekti.
