E keni vënë re që kur flini mirë natën, ditën tjetër jeni më produktivë? Ne e dimë se gjumi i mirë është jetik për shëndetin tonë të përgjithshëm mendor dhe fizik. Sipas një hulumtimi të kryer nga Akademia Amerikane e Mjekësisë së Gjumit, njerëzit që flenë 5 deri në 6 orë ose më pak, kanë një rënie të produktivitetit me 19 deri në 29%. Krahasuar kjo me ata që flenë 8 orë gjumë.
Mos vallë edhe mamatë tona, të cilat gjithnjë janë përpjekur të na bëjnë të flemë herët, dinin diçka më shumë? Zakoni për të fjetur vonë dhe për t’u zgjuar herët mund të ndikojë shumë në produktivitetin dhe performancën tonë, dhe më poshtë po ju paraqesim se si, por edhe në çfarë mënyrash mund ta ndryshoni atë.
Si ndikon gjumi i dobët në produktivitetin tonë?
Mungesa e përqendrimit
Mund ta keni të lehtë të pastroni kuzhinën ose të rregulloni dhomën nëse nuk keni fjetur mirë, por kur bëhet fjalë për detyra që janë më të vështira, një gjumë i mirë është thelbësor. Mungesa e gjumit ndikon drejtpërdrejt në përqendrimin tonë dhe sa mirë mund të performojmë.
Bëhemi të prirur për gabime
Kur jemi të lodhur, reagimet tona janë më të ngadalta, gjë që çon në më shumë gabime.
Jeni më impulsivë
Stresi dhe acarimi i një dite pune mund të intensifikohen nëse nuk keni fjetur siç duhet. Nëse e keni vënë re, kur nuk pushojmë sa duhet, jemi më gjakftohtë. Me kalimin e kohës, mungesa e gjumit mund të çojë edhe në probleme serioze të shëndetit mendor që shkojnë përtej irritimit.
Nëse jeni aktualisht në këtë pikë, ndaloni, merrni frymë dhe rivlerësoni zakonet tuaja të gjumit. Kemi 5 këshilla për ju!
Mbajeni dhomën të freskët
Sado që të pëlqen të ‘strukesh’ në shtrat me batanije, sigurohu që temperatura e dhomës të jetë e duhura. As shumë ftohtë dhe as shumë i nxehtë, sepse nuk ndihmon për të fjetur të qetë. Zgjidhni shtroja dhe çarçafë me materiale komode, njëjtë veproni me rrobat që vishni.
Qëndrojini orareve
Zakonet e parregullta të gjumit mund të shkaktojnë efekte shumë negative shëndetësore. Respektimi i një rutine të kujdesshme para gjumit mund t’ju ndihmojë të bini në gjumë më shpejt. Leximi, të parit një film apo meditimi janë disa mënyra për të filluar t’i sinjalizoni trupit tuaj se është koha për të fjetur.
Ushtrohu rregullisht
29 studime të ndryshme amerikane sugjerojnë se ushtrimet përmirësojnë cilësinë dhe kohëzgjatjen e gjumit. Vetëm 30 minuta ushtrime aerobike në ditë, bëjnë gjithë ndryshimin.
Shmangni telefonin apo laptopin
Që ndriçimi i ekranit gjatë natës ndikon negativisht në cilësinë e gjumit, tashmë dihet. Të paktën dy orë para gjumit, përpiquni të mos përdorni asnjë pajisje të tillë.
Jini të qëndrueshëm!
Sado joshëse mund të jetë të flini më shumë gjatë fundjavave ose në çdo rast kur s’jeni në punë, është mirë t’i përmbaheni orareve të ditëve të tjera. Konsistenca është gjithashtu çelësi për krijimin e zakoneve që zgjasin, kështu që kjo këshillë jo vetëm që do t’ju ndihmojë të flini më mirë, por do ta bëjë të gjithë rutinën tuaj më produktive, të qëndrueshme dhe të qetë.
/a.r
