Deputetët e Kuvendit të Kosovës do të mblidhen pasditen e të premtes në një seancë, që duhet të jetë vazhdim i atyre tri të tjerave më parë të ndërprera si pasojë e bllokimit nga opozita.
Në rend të ditës, siç ka paraparë Kryesia e Kuvendit pa përfaqësuesit e opozitës, do të jenë shqyrtimi dhe miratimi i disa projektligjeve e vendime me rëndësi për vendin, transmeton koha.net. Mirëpo opozita ka paralajmëruar veprime bllokuese të punës së Kuvendit derisa të mos tërhiqen nënshkrimet në të paktën dy marrëveshje, asaj për Asociacionin e Komunave me shumicë serbe, dhe tjetrës për demarkacionin me Malin e Zi. Pozita ndërkaq thotë se nënshkrimet nuk mund të tërhiqen, sepse ato kanë karakter dhe janë detyrim ndërkombëtar.
Ka zëra se në këto rrethana nuk duhet të thirren seanca të Kuvendit. Kuvendi i Kosovës nuk ka mundur të mbajë asnjë seancë gjatë gjithë sesionit të sivjetshëm vjeshtor. Siç u njoftua, presidentja e vendit Atifete Jahjaga këto marrëveshje do t’i dërgojë në Kushtetuese për të vlerësuar nëse ato e cenojnë atë.
