Kuvendi miratoi të enjten me 76 vota projektligjin për lidhjen e marrëveshjeve ndërkombëtare mes shtetit shqiptar dhe vendeve të tjera.
Projekti i propozuar nga Ministria e Jashtme konsiderohet me rëndësi themelore në procesin e lidhjes së marrëveshjeve ndërkombëtare nga pala shqiptare, kryesisht nga Ministria e Jashtme, e cila koordinon dhe mbikëqyr veprimtarinë e te gjitha ministrive të linjës në proceset e propozimit, negocimit, nënshkrimit dhe hyrjes në fuqi të marrëveshjeve të tilla.
Me 102 vota, Kuvendi miratoi dhe disa shtesa e ndryshime në ligjin “Për ndihmën dhe shërbimet shoqërore”, që synojnë rregullimin e mënyrës së dhënies të ndihmës ekonomike, përmes një procesi transparent dhe përdorimit të një formule të pikëzuar, për familjet dhe individët në nevojë, të cilët nuk mund të sigurojnë plotësimin e nevojave bazë jetike për shkak të aftësive dhe mundësive të kufizuara social ekonomike.
Seanca e sotme miratoi gjithashtu dhe tre pr/rezoluta për veprimtarinë e tre institucioneve gjatë vitit 2015. Me të njejtin rezultat votimi, 75 vota pro dhe 29 vota kundër, u miratua pr/rezoluta për veprimtarinë e Radio Televizionit Publik Shqiptar dhe ajo për Komisionerin për të Drejtën e Informimit dhe Mbrojtjen e të Dhënave Personale, ndersa pr/rezoluta për veprimtarinë e Departamentit të Administratës Publike për gjendjen në Shërbimin Civil u votua me 74 vota pro dhe 28 vota klunder.
Votimi i fundit në seancën e sotme ishin dy projektvendimet për përbërjen e komisioneve hetimore për CEZ-n, të kërkuara nga maxhoranca dhe opozita. I pari do të drejtohet nga deputeti i PS-së Taulant Balla, ndërsa i dyti nga ai I PD-se, Edmond Spaho.
Seanca e sotme e Kuvendit u shoqërua me debate të të forta mes maxhorancës dhe opozitës për zhvillimet e fundit politike në vend, arrestimin e Emiljano Shullazit, zgjedhjet në universitete, etj. Debati u ashpërsua dhe më shumë pas deklaratës së ish-kryeministrit Sali Berisha që bëri thirrje për armatosjen e qytetareve me armë, ‘për t’u mbrojtur nga qeveria’, që e konsideroi ‘një organizatë kriminale’. Pas kësaj deklarate, një grup deputetësh të maxhorancës iu drejtuan me nje kërkesë Byrosë së Kuvendit, për të vendosur rreth sjelljes së ish-kryeministrit në seancën e sotme parlamentare, e konsideruar ‘e papranueshme dhe antikushtetuese’.
