Gjykata Kushtetuese ka vendosur kundër dekriminalizimit të veprës penale të ushtrimit të prostitucionit. Gjykata e Lartë kishte kërkuar shfuqizimin e paragrafit të parë të nenit 113 të Kodit Penal, i cili parashikon dënimin nga gjobë deri në 3 vjet burg për çdo person që ushtron prostitucion, duke e konsideruar si të papajtueshëm me Kushtetutën, pasi ky nen diskriminon femrat në raport me meshkujt.
Për Gjykatën Kushtetuese, kërkesa është e pabazuar, pasi neni në fjalë nuk cenon barazinë gjinore, shkruan Gazeta Shqiptare.
“Neni 113 i KP nuk përmban diferencim në përcaktimin ligjor, pasi dënon autorët e prostitucionit, që mund të jenë femra ose meshkuj. Për më tepër, dispozita dënon subjektet, kategorinë e meshkujve/femrave që ushtrojnë prostitucion me vullnet të lirë”, thuhet në vendimin e Gjykatës Kushtetuese.
Kushtetuesja arsyeton se “asnjë nga palët në gjykim nuk paraqiti të dhëna për të argumentuar se viktimat e prostitucionit mbrohen më mirë me dekriminalizimin e kësaj vepre penale ose me përcaktimin e kësaj vepre si kundërvajtje administrative”.
