Kërkesa e Partisë Demokratike për heqjen e mandatit të deputetit të PS Koço Kokëdhima do të shqyrtohet nga Gjykata Kushtetuese të mërkurën e ardhshme, më 28 tetor.
Në muajin prill, PD denoncoi deputetin Kokëdhima, i cili sipas opozitës kishte përfituar fonde publike përmes një kompanie që ai kishte në pronësi, duke shkelur kështu ligjin dhe kushtetutën. Sipas opozitës deputeti socialist ka përfituar 150 herë, para nga buxheti i shtetit, përmes kompanisë së tij.
Në atë kohë, kërkesa e opozitës u rrëzua nga mazhoranca, ndërsa deputeti socialist tha se në çastin që ai ka marrë mandatin i ka shitur aksionet e tij në kompaninë që ka përfituar tenderat.
