Qëndrimi i Visho Ajazi Likës në krye të Shërbimit Informativ, është ende i paqartë. Ditën e djeshme, atij iu bënë 5 vite në krye të një prej institucioneve më të rëndësishme dhe praktikisht mandati ka mbarur. Por është ende i paqartë vendimi që do të marrë kryeministri i vendit, Edi Rama.
Pozicioni i kreut të SHISH ka shkaktuar gjithmonë debate në vendin tonë. Ish-kryeministri Sali Berisha kur mori pushtetin vendosi të shkarkonte Bahri Shaqirin nga detyra, ndërsa propozoi që mandati i kreut të SHISH të jetë 5 vite.
Kur Rama erdhi në pushtet hasi vështirësi në largimin e drejtorit të SHISH, pasi në shumë raste u kërkua që kjo të ndodhte po pa e gjetur me shkelje ishte e pamundur. Por tani që ai ka bërë 5 vite në pushtet dhe që qeveria mori mandatin e dytë, sërish nuk ka një kandidaturë që do e zëvendësojë. Mësohet se qeveria e ka shtyrë për në shtator vendimin nëse do e zëvendësojë Visho Likën apo do e lejojë të qëndrojë në detyrë.
Burimet thanë se gjithçka do vendoset me anë të ligjit të ri. Në shtator do të hartohet një ligj i ri, i cili do sjellë shumë ndryshime sa i takon Shërbimit Informativ Shtetëror, duke vendosur si kufizime mandatesh dhe ndryshime në kontrollin e institucionit, rekrutimin e punonjësve, etj shkruan “sot”. Pasi të miratohet ky ligj, atëherë pritet që të ndodhë dhe zëvendësimi i kreut të SHISH, Visho Ajazi lika.
Ai u emërua nga Sali Berisha më 9 gusht 2012 dhe emri i tij shkaktoi shumë debat pasi ka qenë pjesë e SHISH, kur në krye të tij ishte Bashkim Gazidede. Por ajo që e ka karakterizuar punën e kreut të SHISH, kanë qenë gjithmonë skandalet. Rasti më i fundit ishte ai i 2013 kur vetë Lika pranoi se kishte përgjuar Edi Ramën, kreun e opozitës në atë kohë dhe Ilir Metën.
Pasi Meta braktisi Berishën, SHISH nisi përgjimet dhe u zbulua një skandal i tërë, pasi i gjithë parlamenti ishte përgjuar dhe dyshimet ishin se Sali Berisha kishte informacione. Edhe më vonë Visho Lika është akuzuar se raporton te Sali Berisha, pasi ish-kryeministri gjithmonë ka qenë i informuar.
Por pavarësisht kësaj marrëdhëniet e tij me qeverinë Rama nisën të ndryshojnë, pasi ai edhe u dekorua nga kryeministri. Kjo ka bërë që të jepen sinjale se ai do mund të jetë në detyrë dhe për disa muaj, ndërsa më pas do vendoset nga qeveria e re se çfarë do të ndodhë.
