Kuvendi miratoi dje me 86 vota pro dhe 2 vota kundër të deputetëve Ben Blushi dhe Mimoza Hafizi ligjin që do të fshijë taksat e papaguara për biznesin dhe makinat. Nga falja e taksave dhe gjobave do të përfitojnë 120 mijë qytetarë. Amnistia i shtrin efektet në dy periudha. Për periudhën e parë, ligji do të falë pa kusht taksat e papaguara para vitit 2011. Në periudhën 2011-2014, ligji parashikon faljen e gjobave, me kusht pagesën e plotë të detyrimit.
Ministri i Financave, Arben Ahmetaj, informoi dje pas miratimit të ligjit se faljen e taksave dhe gjobave e përfitojnë mbi 220 mijë qytetarë. “Janë gati 30 miliardë lekë që fshihen, detyrime pa kushte për sipërmarrjen. Nga 1 janari 2011 deri më 31 dhjetor 2014 ka fshirje me kusht pagesën e pjesshme. 90 mijë individëve u falen gjobat prej 10 mijë lekësh.
Nga ky ligj përfitojnë mbi 220 mijë qytetarë. Falja nuk ka implikime penale”, u shpreh ministri Ahmetaj. Afati për të përfituar nga ligji është deri më 31 dhjetor 2017. Kjo do të thotë që qytetarët që kanë detyrime pa paguar për periudhën 2011-2014, kanë afat deri në fund të vitit të paguajnë të plotë principalin që të përfitojnë faljen e gjobave dhe kamatëvonesave, raporton “Panorama”.
MAKINAT
Drejtoria e Shërbimit të Transportit Rrugor ka gati udhëzimin për zbatimin e amnistisë për 140 mijë makina që do të përfitojnë nga falja e taksave dhe gjobave. Udhëzimi parashikon publikimin e targave online në portalin “E-albania” dhe pranë drejtorive rajonale listën me targat e makinave që përfitojnë nga amnistia.
Efekti financiar llogaritet 120 milionë dollarë, ku vetëm për periudhën e parë të ligjit falen 53 milionë dollarë. Ligji parashikon që ata pronarë që kërkojnë të çregjistrojnë makinën, do t’u falen të gjitha detyrimet deri në dhjetor të 2010- s.
Pronarët që kanë detyrime pa paguar, por kërkojnë të mbajnë makinën në qarkullim, u falen detyrimet e papaguara deri në dhjetor 2010, por me kushtin që të paguajnë detyrimet për periudhën 2011-2014 pa paguar gjobat dhe kamatëvonesat. Afati për pagesën e taksave është deri më 31 dhjetor 2017.
Në rast të kundërt, makina do të çregjistrohet dhe targa do t’i dërgohet Policisë së Shtetit.
PENSIONET
Për kontributin e sigurimeve shoqërore dhe shëndetësore, objekt i fshirjes do të jenë vetëm gjobat e sigurimeve shoqërore për të punë- suarit në qytet dhe fshat. Deri në dhjetor të 2010-s e më përpara, ligji parashikon fshirjen e gjobave për efekt të mospagimit të kontributit pa kusht.
Për periudhën 2011- 2014, gjobat e kontributeve të sigurimeve shoqërore dhe shëndetësore do të falen, me kusht nëse paguhet i plotë principali. Nga amnistia do të përfitojnë edhe të vetëpunësuarit në bujqësi. Për këtë kategori do të falen gjobat e 5 viteve të fundit. Fermerëve do t’u amnistohen gjobat e kontributeve të papaguara që nga 1 janari 2011 deri më 31 dhjetor 2016, nëse paguajnë të plotë taksën.
Përjashtimet/ Bizneset e dënuara nga Gjykata s’përfitojnë
Bizneset që janë dënuar me vendim të formës së prerë nga Gjykata për evazion do të përjashtohen nga skema e amnistisë. “Bizneset që kanë detyrime tatimore ose doganore, për të cilat ka një vendim gjyqësor të formës së prerë, si të dënuar penalisht për evazion fiskal apo kontrabandë, nuk përfitojnë nga fshirja e detyrimeve”, thuhet në ligj. Për ato biznese që janë në proces ankimimi administrativ ose gjyqësor për detyrimet tatimore dhe doganore, përfitojnë nga falja e taksave dhe gjobave, nëse ato heqin dorë nga ankimi administrativ ose nga e drejta e padisë në çdo fazë dhe shkallë të gjykimit pranë Gjykatës Administrative. Më tej, administrata tatimore ose doganore, për detyrimet që fshihen sipas këtij ligji, në rastin kur i ka filluar, ndërpret procedurat e mbledhjes me forcë të detyrimeve. Për detyrimet tatimore ose doganore që nuk përfitojnë nga falja sipas këtij ligji, procedurat e mbledhjes së detyrimeve vijojnë të kryhen sipas përcaktimeve në legjislacionet përkatëse.
ma.me
