Ambasadori amerikan Donald Lu dha sot një prej deklaratave më të forta. Ai foli me emra, për të ashtuquajturit “peshqit i mëdhenj” teksa tha se 4 klane drejtojnë 20 familje të fuqishme mafioze në Shqipëri. Kjo deklaratë vjen në një kohë kur incidenti i Elbasanit ka tronditur jo pak opinionin.
Në lidhje me bandat e fuqishme në vend, është pyetur edhe Drejtori i Drejtorisë për Hetimin e Krimeve të Rënda në Policinë e Shtetit Niko Brahimaj.
Ai ishte i ftuar në studion e “Top Story” ku theksoi se ka evidenca edhe nga policia për grupet e fuqishme kriminale.
“Kemi evidenca për klanet kriminale, i kemi referuar në prokurori. Me prokurorinë kemi bashkëpunim shumë të mirë. Policia disponon dosje të këtyre karaktereve, por unë këtu nuk mund të jap asnjë detaj. Në shumë nga këto dosje ka produkt të mirë t’ja paraqesim prokurorisë”, dekalroi ai. Brahimaj nuk preferoi të japë detaje për këto grupime, pasi tha se cënohen hetimet.
Lidhur me dosjet e bujshme kriminale të pazbardhura, Brahimaj konfirmoi se do të rihapen me urdhër nga drejtori i policisë.
“Edhe me dosjen e deputetit Xhindi do merremi, se është urdhëruar nga drejtori hapja e dosjes. Do merremi edhe me dosjen Santo…do merremi me të gjtiha dosjet e vjetra, do rihapen…”, tha drejtori i Hetimit të Krimeve të Rënda.
/a.m.
