Policia ka nisur një hetim për vrasjen e ish-kryeministrit japonez Shinzo Abe – por pak dihet për të dyshuarin që u arrestua në skenën e të shtënave fatale të premten. Tetsuya Yamagami, 41 vjeç, pranoi se kishte qëlluar Abe, tha policia në Nara gjatë një konference për shtyp të premten.
Yamagami, i cili është i papunë, u tha hetuesve se kishte urrejtje ndaj një grupi të caktuar me të cilin mendonte se Abe ishte i lidhur. Policia nuk i ka dhënë emrat e grupit.
I dyshuari përdori një armë të bërë vetë për të qëlluar ish-kryeministrin Abe, tha policia, dhe pamjet nga vendi i ngjarjes treguan atë që dukej të ishte një armë me dy tyta metalike cilindrike të mbështjellë me shirit të zi. Autoritetet më vonë konfiskuan disa sende të bëra me dorë si pistoletë nga shtëpia e Tetsuya Yamagamit.
41 vjeçari kishte prodhuar lloje të shumta armësh me tuba hekuri që ishin mbështjellë me shirit ngjitës, raportoi transmetuesi publik japonez NHK, duke cituar policinë. Në shtëpinë e tij u gjetën armë me tre, pesë dhe gjashtë tuba hekuri si tyta.
Nga të gjitha armët që kishte krijuar, ajo e përdorur dje në varsjen e ish-kryeministrit të Japonisë ishte më e forta. Tetsuya Yamagami kishte futur dy plumba në tytat metalike dhe e qëlloi pas shpine Shinzo Aben. Ai mori plagë të rënda në qafë dhe vdiq në spital.
Agjencia Kombëtare e Policisë së Japonisë tha se do të rishikojë masat e sigurisë të vendosura përpara të shtënave të së premtes. Sipas saj, disa dhjetëra oficerë dhe personel sigurie nga policia Metropolitane e Tokios ishin në detyrë dhe thuhet se e kishin parë Abe nga të gjitha anët gjatë fushatës në Nara.
g.kosovari
