E lindur në New Mexico në vitin 1969 dhe e rritur në Kaliforni, Sánchez studioi fillimisht në El Camino College dhe më pas në Universitetin e Kalifornisë Jugore. Sipas faqes zyrtare të universitetit, në atë kohë ajo njihej si Wendy Sánchez, shkruan A2 CNN.
Karrierën televizive e nisi në KTVK-TV në Phoenix, për të vijuar më pas me paraqitje në emisionin “Extra”, si bashkë-prezantuese në “Good Day LA”, dhe si prezantuesja e parë e spektaklit të kërcimit “So You Think You Can Dance”.
Në moshën 40-vjeçare, Sánchez mori licencën si pilote helikopteri, një pasion i frymëzuar nga i ati, instruktor fluturimi. Në vitin 2016, ajo themeloi Black Ops Aviation, kompania e parë për prodhim videosh ajrore, e themeluar nga një grua. Sipas The Hollywood Reporter, kompania ka ofruar konsulencë për filmin “Dunkirk” të Christopher Nolan.
“Kisha një punë, kisha një karrierë, por më pas gjeta një thirrje të brendshme”, i tha ajo revistës. “E doja botën e argëtimit dhe e doja filmimin, ndaj arrita t’i bashkoja të dyja”.
55-vjeçarja shërben gjithashtu si nënkryetare e Bezos Earth Fund dhe është e përkushtuar ndaj “luftës kundër ndryshimeve klimatike dhe mbrojtjes së natyrës, si dhe arsimit të fëmijërisë së hershme, programeve sociale dhe mbështetjes për strehim”, sipas faqes së organizatës.
Në vitin 2025, Sánchez ishte njëra nga gjashtë gratë që udhëtuan drejt kufirit të hapësirës me raketën Blue Origin NS-31, në një fluturim të shkurtër 10-minutësh të organizuar nga vetë Bezos.
Sipas Blue Origin, ajo “e bëri të mundur këtë mision” dhe zgjodhi personalisht bashkudhëtaret e saj në hapësirë, përfshirë gazetaren Gayle King, këngëtaren Katy Perry dhe shkencëtaren kërkimore dhe aktivisten për të mbijetuarat e dhunës seksuale, Amanda Nguyen. Sánchez bashkëpunoi gjithashtu me shtëpinë luksoze të modës Monse për të dizajnuar uniformat e reja të fluturimit për këtë mision.
Sánchez është edhe autore e një libri për fëmijë të titulluar “The Fly Who Flew to Space” (Miza që fluturoi në hapësirë), botuar në anglisht dhe spanjisht në vitin 2024. Libri rrëfen historinë e mizës Flynn që udhëton në hapësirë dhe kthehet me një përkushtim të ri për planetin, një histori që Sánchez e përshkroi për revistën People si “një metaforë për kureshtjen dhe ndjekjen e ëndrrave”.
Ajo ka tre fëmijë: një djalë, Nikko, me ish-lojtarin e futbollit amerikan Tony Gonzalez; dhe një djalë, Evan, si dhe një vajzë, Ella, me ish-bashkëshortin Patrick Whitesell, një drejtues në industrinë e argëtimit. Në një intervistë të vitit 2023 për The Wall Street Journal, Sánchez tha se ruan një marrëdhënie të ngushtë me Gonzalez dhe gruan e tij, duke i përshkruar ata si “miqtë e mi më të mirë”.
Sánchez dhe Bezos, 61 vjeç, dolën publikisht si çift në vitin 2019, pasi Bezos njoftoi divorcin nga bashkëshortja e tij prej 25 vitesh, MacKenzie Scott. Çifti u fejua në maj të vitit 2023.
Në janar, Sánchez shoqëroi Bezos gjatë inaugurimit të dytë të Presidentit amerikan Donald Trump. Gjatë ceremonisë, çifti ishte ulur pranë Elon Musk dhe Mark Zuckerberg.
