Një biznesmen 40-vjeçar është shpallur në kërkim nga Policia pasi akuzohet se tentoi të korruptojë një gjyqtare me një shumë prej 500 mijë lekësh të reja, në këmbim të favorizimit në një çështje.
Bëhet fjalë për biznesmenin e hekurit Ervin Braho i cili tentoi të korruptojë gjyqtaren Selvije Gjonçaj në Gjykatën Administrative Tiranë.
Ky shtetas la një zarf në zyrën e gjyqtares me 500 mijë lekë dhe u largua, por ajo njoftoi prokurorinë.
Braho ka paditur Ministrinë e Ekonomisë së cilës i kërkon dëmshpërblim për prishjen e një kontrate. Pikërisht ai ka kërkuar nga gjyqtarja që ti japë të drejtë për këtë çështje.
Kush është Braho, atentati me eksploziv
Ervin Braho është biznesmen nga Pogradeci dhe aktivitetin e tij e ka të përqendruar kryesisht në tregtimin dhe transportin e hekurit. Ai rezulton ortak edhe në ndërtimin e një hidroccentrali në rrjedhën e lumit Mat, kontratë e anulluar dhe për të cilën ai ka paditur Ministrinë e Ekonomisë.
Por, më tepër se sa kontratat fitimprurëse, emri i tij është bërë i njohur disa vite më parë për drejtësinë kur ai i shpëtoi një atentati me tritol të telekomanduar.
Bisnesmenit nga Pogradeci i vendos lëndë shpërthyese në automjetin e tij disa vite më parë por fatmirësisht ai arriti të shpëtojë gjallë pavarësisht dëmtimeve të rënda që pësoi.
Ngjarja ndodhi në maj të vitit 2009 në qytetin e tij në Pogradec.
Ervin Braho ka qenë duke lëvizur me automjetin e tij fuoristradë, tip “Land Rover”, me targa TR 8114. Ka qenë ora rreth 7 e mëngjesit kur automjeti po kalonte pranë qednrës së qytetit.
Në këtë kohë, makina ka shpërthyer nga poshtë, duke i sjellë dëmtime serioze 34-vjeçarit në pjesën e këmbëve.
Ngjarja nuk u zbulua kurrë nga policia por pista kryesore e hetimit aso kohe ishte ajo e konkurencës.
/Javanews.al
