Lideri i partisë opozitare në Britani, Jeremy Corbyn, nuk ka nguruar të festojë rezultatin ‘befasues’ të zgjedhjeve, duke kërkuar madje edhe dorëheqjen e Kryeministres Theresa May.
Por, udhëheqësi laburist britanik, Jeremy Corbyn shkaktoi një debat të ri lidhur me disa citime që bëri rreth dy vite më parë kur citoi udhëheqësin komunist të Shqipërisë, Enver Hoxha.
Sipas medias britanike, Corbyn e ka përshkruar diktatorin komunist si një “sundimtar të ashpër”.
Udhëheqësi laburist britanik iu referua mesazhit me rastin e Vitit të Ri në vitin 1967, drejtuar popullit shqiptar, kur Enver Hoxha kishte thënë: “Ky Vit i Ri do të jetë më i vështirë sesa viti që po lëmë pas. Nga ana tjetër, do të jetë më i lehtë sesa viti i ardhshëm”.
Jeremy Corbynpatinjë vit të vështirë në partinë në fjalë, drejtimin e së cilës e mori pas humbjes së laburistëve në zgjedhjet e fundit parlamentare, dhe shumë nga deputetët e kësaj partie, përkrahës të ish-udhëheqësit legjendar Tony Blair, janë kundër politikave dhe qëndrimeve të udhëheqësit të ri, si në rastin e sulmeve ajrore britanike ndaj ISIS-it në Siri.
Jeremy Corbyn nuk i fsheh preferencat e tij politike dhe parapëlqimin e tij për marksizmin. Një pjesë e opinonit e vlerësojnë atë për sinqeritetin e pikëpamjeve të tij politike të ekstremit të majtë, ndërkohë të tjerë janë të shqetësuar se një ideologji e tillë, si ajo marksistja, e përqafuar nga ndonjë udhëheqës i majtë britanik, kurrë nuk i ka sjellë ata në pushtet në Britani, në vendlindjen e kapitalizmit.
Ndërkohë, Konservatorët e Theresa May nuk ia dolën dot të marrin shumicën parlamentare, në zgjedhjet elektorale të zhvilluara në Britani ditën e djeshme.
Ata humbën mbi dhjetë vende në Parlament, krahasuar me parlamentin paraardhës, ku mes humbësve, ishin edhe pesë ministra të qeverisë May, të cilët nuk arritën të mbanin vendin e tyre në Parlament. /b.d
