Seanca e sotme e parlamentit është shoqëruar me debate të shumta mes deputetëve të opozitës dhe përfaqësuesve të mazhorancës, në lidhje me ligjit për importin e plehrave.
Deputeti socialist, Blendi Klosi, ka thënë se “Neni 49 i ligjit flet qartë që vendi do bëhet vend depozitimi i plehrave. Ligji hap vetëm dritare për t`u futur plehra në vend”- theksoi Klosi ndërsa shtoi se ato nuk janë lëndë e parë, por thjesht plehra që importohen.
Sipas tij treguesi i ndotjes është alarmant, krahasuar me normat e BE-së dhe një ndër shkaqet kryesore të shtimit të kancerit në vend.
Deputeti i PS-së i bëri thirrje të gjithë deputetëve që ndodhen në sallën e Kuvendit, të mos e votojë këtë ligj që do kthehet në gangrenë për Shqipërinë.
“Ky ligj ka ngjallur interesin e opinionit publik kudo që jetojë shqiptarët. Ky ligj është qoka e radhës që kryeministri i bën ndonjë klani klientelist. Ky ligj tregon se Shqipëria do të bëhet vend grumbullimi për plera, kërkohet që Shqipëria të bëhet depo plehrash. Është një ligj që në asnjë nen të tij nuk flet qartë për menaxhimin e plehrave”, tha Klosi ndërsa shtoi se ligji duhet të kalojë në referendum, që të vendosin shqiptarët për të.
Pse keni frikë nga opinioni shqiptar? Pse të mos i dëgjojmë para se të votojmë me kartonat që ata na i kanë dhënë në dorë? Votojmë një ligj që na ndikon të gjithëve. Deputetë mos e votoni ketë ligj, në emër të fëmijëve, prindërve e brzave që do vijnë. Mbase nuk do jeni më në listat për deputetë se Berisha nuk do ju lejojë, por është më mirë”, tha Klosi më tej.
Deputetit socialist i është përgjigjur kryeparlamentarja Topalli, e cila ka thënë se ky ligj duhet të votohet pikërisht për të ardhmen e fëmijëve të shqiptarëve.
“Në emër të fëmijëve tuaj, ftoj opozitën që të votojë këtë ligj. Sa për mbetjet në Tiranë, duhet t`i kërkoni llogari Ramës, por ju nuk e bëni sepse ju bën kurban”, tha Topalli.
Shënim: Ky është një shkrim i botuar më 3 nëntor 2011 në gazetën TemA. Sot rolet kanë ndryshuar dhe Topalli thotë se për hir të fëmijëve tanë, nuk duhet të ketë import mbetjesh në Shqipëri./a.k
