Nga Alfred Peza
Shqipëria ndoshta nuk ka qenë asnjëherë në një pozicion të tillë kaq të favorshëm në raport me procesin e integrimit të vendit në BE, si ajo që u duk pas konferencës për shtyp të Presidentit të Komisionit Europian Junker, me Kryeministrin Rama në Tiranë. Një pozicion i cili, pas reformës në drejtësi dhe fillimit të efekteve të saj të para, nisjes së procesit të vettingut për gjyqtarët e prokurorët dhe rënia dakord deri tani në parim për arritjen e marrëveshjes me Greqinë, bën që të duket sikur vetëm shqiptarët ta kenë tashmë në dorë fillimin e negociatave për anëtarësimin në BE.
Fillimisht Junker me elegancë, i dha përgjigje komisionerit Johannes Hahn që ndodhej përballë tij në sallën e konferencës në Tiranë, për deklaratën që ai bëri pak orë më parë për gjermanen “Die Welt” kur u shprese se “Franca, por para së gjithash Gjermania kanë rezervat e mëdha në rastin e Shqipërisë. Shqiptarët nantyrisht që vuajnë nën një imazh të caktuar”. Ndërsa Junker, përkrah Edi Ramës ia ktheu: “Është një moment që e tregon ndryshimin, duke përfshirë faktin që Shqipëria, për mua nuk ka asgjë të habitshme që të mos jetë pjesë e BE”.
Më pas, Presidenti Junker shtoi se “konstatoj që Shqipëria po akumulon progres, se ka nisur shumë reforma dhe kështu Komisioni Evropian do ti hapë negociatat. Nuk kam ardhur për premtime bosh, sepse s’është ky qëllimi, por dua të inkurajoj Shqipërinë për reformat kundër krimit, për Vettingun dhe Gjykatat.”
Më pas ai shtoi se duhet ti jepet fund konflikteve rajonalë dhe e mbështesim Shqipërinë në përmirësimi me vendet e Ballkanit Perëndimore (duke nënkuptuar Greqinë). Vendi i Shqipërisë është në BE”.
Duke shtuar më pas se “sa për vettingun konstatoj që procesi po jep rezultate mbresëlënëse, ne jemi të siguruar dhe procesi do të vijojë edhe kur Komisioni do të publikojë rezultatet. Pastaj ka raste që i interesojnë opinionit shqiptar që mund të ndikojnë në këtë lloj diskursi, por mendoj që i takon drejtësisë shqiptare që të bëjë punën e saj, dhe mendoj që do ta bëjë.”
Sipas raportimeve të medias, Juncker dhe Hahn do të vendosin theksin gjatë vizitës në Shqipëri te zbatimi i reformës në drejtësi në prag të rekomandimit të hapjes së negociatave, që pritet të marrë dritën jeshile në qershor. Ndërkohë Kryeministri Rama shprehu bindjen se marrëveshja mes Greqisë dhe Shqipërisë do të përmbyllet me sukses dhe do të jetë një tjetër arsye që BE të vlerësojë Shqipërinë si një shtet serioz.
Nisur nga këto qëndrime dhe vlerësime, për herë të parë përfaqsuesit më të lartë të Brukselit, nuk artikuluan kritika, detyra shtëpie shtesë apo prioritete të reja, që i kemi dëgjuar sa herë që Shqipëria dukej vitet e shkuara se priste një moment si ky. Shenjë dhe provë e qartë dhe e sigurtë kjo, se më në fund, duket se janë përmbushur të gjitha standardet e nevojshme dhe të domosdoshme për të hapur negociatat e anëtarësimit mes Shqipërisë dhe Bashkimit Europian.
Ajo që prêt më shumë pas kësaj Brukseli, është dhënia e rezultateve konkrete nga procesi i pastrimit të sistemit të drejtësisë shqiptare dhe vijimi i ngritjes, konsolidimit e dhënies së rezultateve konkrete për ndëshkimin e krimit, korrupsionit dhe dhënies fund të kulturës së mosndëshkueshmërisë. E nga ana tjetër, sigurisht zgjidhja njëherë e përgjithmonë e problemeve të akumuluara në rreth 70 vjet në raportet Shqipëri- Greqi, si një kusht i panegociueshëm për të mos eksportuar nesër problemet dypalëshe, brenda në union.
Qeveria dhe mazhoranca në Shqipëri janë më të interesuarat që këto procese të ruajnë këtë ritëm dhe trend pozitiv, në mënyrë që të mos ketë surpriza të pakëndshme rrugës. Fakti që brenda palës shqiptare ka qëndrime si ai i séancës për shkarkimin e ish Prokurorit të Përgjithshëm në Parlament, mbrojtja që po i bëhet Llallës nga disa segmente të opozitës pas vendimit të sekretarit Amerikan të Shtetit Rex Tillerson për të mos lejuar familjen e tij të udhëtojë drejt SHBA për shkak të përfshirjes së tij në raste të mëdha korrupsioni dhe debati i tensionuar Presidencë- Qeveri për negociatat me Athinën, tregon se brenda klasës sonë politike ka një problem.
Kur vjen puna për një çështje kaq madhore si fillimi i negociatave të anëtarësimit të Shqipërisë në BE, sigurisht që e gjitha klasa politike ka edhe merita, por është edhe bashkpërgjegjëse sot përpara shqiptarëve për vonesën dhe nesër para historisë, për shpërdorimin e këtij momenti të papërsëritshëm. Ndaj të gjithë penguesit, duhen treguar me gisht dhe duhen ndëshkuar politikisht, në përpjesëtim me dëmin që mund ti shkaktojnë ëndrrës së kahershme të shqiptarëve, për të qenë edhe zyrtarisht tashmë, pjesë e familjes së madhe europiane.
