Tomor Alizoti, drejtuesi politik i Lulzim Bashës për qarkun e Beratit në zgjedhjet e 25 prillit 2021, do jetë edhe një ndër deputetët e PD, në Kuvendin e ri, që do të konstituohet në shtator.
Alizoti u fut nga Basha në listat e sigurta në qarkun e Beratit në zgjedhjet e 25 prillit, duke siguruar kështu karrigen e deputetit.
Por, raportet mes kreut të Republikës së re, Lulzim Basha dhe deputetit të zgjedhur Tomor Alizoti, ndër vite kanë qënë mes “dashurisë dhe urrejtjes”.
Në vitin 2017, “Luli ishte i keq”, ndërsa në vitin 2021 qenka bërë “i mirë”, sepse i dha një karrige deputeti Tomor Alizotit.
Por, çfarë deklaronte për Lulzim Bashën, në vitin 2017, Tomor Alizoti.
Ky i fundit, në atë kohë nuk kursente akuzat për Lulzim Bashën, të cilit i kërkonte llogari për marrëveshjen e 17 majit me kryeministrin Edi Rama dhe pse i gënjeu demokratët duke i mbajtur për rreth tre muaj në çadër.
“Pashë që Z.Basha ka dalë sërish të takojë qytetarët. Çfarë do tu thotë atyre që qëndruan denjësisht 90 ditë në çadër kur u ul e bëri marrëveshje me Ramën?
Çfarë do tu thotë antikomunistëve për deputetët e tij të cilët votuan Ruçin? Mos vallë përgjegjës për të gjitha këto që ndodhen janë ata që mendojnë ndryshe? E djathta ka nevojë për shpresë”-shkruante Tomor Alizoti, në një postim në rrjetet sociale, në tetor të vitit 2017.
