(Update) Pas orës 8.30 janë ndërprerë të shtënat në Lagjen e Trimave në Kumanovë dhe se situata është e qetë.
Megjithatë qytetarët e Kumanovës janë të shqetësuar dhe në pritje të ndryshimit të situatës dhe normalizimit të saj. Banorët apelojnë që të ndërhyhet sa më shpejt në këtë situatë dhe se këtë thirrje i`a bëjnë faktorit politik shqiptar në qeveri dhe faktorëve ndërkombëtarë.
Nga ana tjetër Presidenti Gjorge Ivanov ka thirrur mbledhjen e Këshillit të Sigurisë Kombëtare në format të zgjeruar e cila pritet të diskutojë zhvillimet në Kumanovë.
Në këtë mbledhje përveç anëtarëve të saj janë thirrur edhe liderët e partive më të mëdha në vend, lideri i LSDM-së Zoran Zaev, lideri i BDI-së Ali Ahmeti dhe lideri i PDSH-së Menduh Thaçi. Pas përfundimit të mbledhjes, presidenti Ivnov do të ketë një dalje për mediat.
Kumanova zgjohet mes të shtënave, UÇK: Nuk jemi grup terrorist
Kumanova është zgjuar sërish sot nën të shtënat e fuqishme të armëve të kalibrit të rëndë. Në Lagjen e Trimave të Kumanovës po vazhdojnë të shtënat sporadike dhe lëvizje të helikopterëve mbi këtë zonë.
Sipas asaj që raportojnë mediat maqedonase situata mbetet e pandryshuar që prej mbrëmjes së djeshme. Një pjesë e banorëve janë larguar nga shtëpitë e tyre për të evituar ndonjë incident, për shkak të përleshjeve të armatosura.
Njësitë speciale të policisë janë të vendosura nga pjesa hyrëse kryesore e lagjes nga tregu i Kumanovës.
Sakaq, grupi i armatosur i Ushtrisë Çlirimtare Kombëtare i cili ka marrë përsipër sulmin me armë ndaj policisë, ka hedhur poshtë pretendimin e Ministrisë së Brendshme duke u shprehur se nuk janë një grup terrorist.
Ata pranojnë se janë të përfshirë në konfliktin e armatosur me policinë, ndërsa mohon të jenë “grup terrorist”, siç i ka cilësuar ministrja e Brendshme e Maqedonisë, Gordana Jankullovska.
Ja komunikata e publikuar:
Në këtë kohë të vështirë letrat janë hapur me shtetin policor antidemokratik të IRMJ.
Konflikti i armatosur në qytetin e Kumanovës, dhe rrethinat e tij është një reagim i vendosur i strukturave të Ushtrisë Çlirimtare Kombëtare dhe jo “i grupeve terroriste”, sipas variantit zyrtar të Ministrisë së Brendshme të IRMJ.
Deklarimet e Jankullovskës janë të sakta për dëmet që kanë pësuar forcat e saj kriminale. Rezultojnë 5 policë të vrarë dhe mbi 20 të plagosur. Kjo është pasoja e reagimit tonë të ashpër, të cilin nuk do ta ndalim në ditët që vijnë.
Jankullovska tu vërë emrin e vërtetë “të arrestuarve” pas “dorëzimit të tyre”, të mos mashtroje opinionin e vëmendshëm shqiptar dhe më e pakta, t’i kthejë edhe një herë prapa ata civilë të paguar dhe t’i veshë me uniformën ushtarake.
Ne hedhim poshtë me përbuzje këtë inskenim të turpshëm dhe amator, pre e të cilave janë bërë një numër i madh portalesh dhe gazeta e agjenci lajmesh, të cilat në mënyrë jo profesionale janë përpjekur të dezinformojnë opinionin shqiptar. Jemi mësuar me veprime e qëndrime të tilla policore në një qeveri policore.
Mashtrimi sipas versionit zyrtar të Ministrisë së Brendshme të IRMJ tregon qartë frikën që ka kapur strukturat shtetërore, përballë reagimeve tona dhe valës në rritje të protestave paqësore të shqiptarëve kudo, brenda dhe jashtë IRMJ. Mbështetja e vëllezërve tanë brenda dhe jashtë territoreve shqiptare është e ndjeshme dhe vazhdon të jetë në rritje.
Shtabi i drejtimit bën me dije se, forcat tona janë plotësisht të organizuara në zonën e tyre të aksionit, të disponueshme dhe të afta, me mjete të mjaftueshme që të vazhdojnë luftën kundër strukturave kriminale të shtetit të IRMJ. Shpifjeve “zyrtare” të Jankullovskës u doli ngjyra edhe në këtë rast.
I bëjmë me dije qeverisë shqiptare në Tiranë dhe në Prishtinë, larg fjalëve diplomatike të pavlera për këtë situatë, të kthejnë vëmendjen me reagimin pozitiv drejt organizatave ndërkombëtare europiane, për ndaljen e dhunës policore mbi popullsinë civile të pafajshme.
Ne nuk do të mbajmë më përgjegjësi për ata shqiptarë që vazhdojnë të qëndrojnë brenda strukturave policore dhe ushtarake të shtetit të IRMJ.
Strukturat e Ushtrisë Çlirimtare Kombëtare janë në mbrojtje të popullatës dhe ju bëjnë thirrje qytetarëve të jenë të kujdesshëm dhe rrinë larg vatrave të përplasjes me armë.
Të gjithë bashkë, kundër shpifjeve, gënjeshtrave, përçarjes dhe akuzave pseudopatriotike, me besim se do ta rrëzojmë këtë regjim kriminal, për ti hapur rrugën lirisë dhe dinjitetit kombëtar”, thuhet në komunikatën e nënshkruar siç nënvizohet nga zëdhënësi Gostivari.
Redaksia Online
(JavaNews.al)
