Nga 70 mijë euro do të përfitojnë familjarët e policëve të vrarë, dhe 13 – 40 mijë euro për çdo policë të plagosur, 5 – 10 mijë euro çdo polici në aksion dhe nga 1600 euro si ndihmë fillestare për familjet me shtëpi të dëmtuara.
Qeveria e Maqedonisë mbrëmë në mbledhjen e mbajtur ka vendosur kompensimin e të gjitha dëmeve lidhur me aksionin e armatosur në Kumanovë. Në këtë seancë siç mësohet kanë marrë pjesë edhe ministrat e BDI-së.
Sipas planit të miratuar, nga 70 mijë euro kompensim përfitojnë familjet e policëve të vrarë.
Kompensime financiare janë planifikuar edhe për të burgosurit, 40 mijë euro do të marrë oficeri më i plagosur, nga 35 mijë për çdo policë të plagosur rënë dhe 19 policë që kanë plagë më të lehta do të marrin nga 25 mijë euro, por disa prej tyre nga 15 mijë euro.
Anëtarëve të Njësisë për Operacione Speciale dhe anëtarët e Njësisë për ndërhyje të shpejtë që ishin të përfshirë në operacionin e policisë në Kumanovë do t’u jepet kompensim financiar në vlerë prej 10,000 euro për anëtar.
Anëtarëve të njësisë së helikopterëve që morën pjesë në aksion edhe profesionistëve nga shtabi të cilët kanë udhëhequr aksionin në Kumanovë do tu jepet kompensim financiar në vlerë prej 10,000 euro për anëtar.
Anëtarëve të Njësisë Speciale të Policisë që kanë qenë të përfshirë në operacionin e policisë në Kumanovë, do tu jepet kompensim financiar në vlerë prej 5.000 euro për anëtar.
Qeveria gjithashtu ka vendosur që edhe mjekëve që kanë ndihmuar policët e plagosur tu japë kompensim një rrogë të plotë.
Nga 1600 euro kompensim fillestar për familjet me shtëpi të rrënuara dhe dëmtuara
Sa i përket shtëpive të rrënuara dhe atyre të dëmtuara dhe djegura, është planifikuar një ndihmë fillestare e vogël prej vetëm 1600 euro, ndërsa është formuar një Komision për vlerësimin e dëmeve të pronës së ndryshme të banorëve dhe familjeve, që janë dëmtuar gjatë aksionit.
Komisioni është vendosur që në afat prej 7 ditëve të dalë në terren dhe të grumbullojë të dhënat që më pas menjëherë t’ia dorëzojë Qeverisë. Komisioni do të përbëhet nga përfaqësues të Qeverisë dhe komunës së Kumanovës.
Qeveria ka vendosur të kompensojë 100 për qind dëmin e shkaktuar.
