Kryetari i Parlmentit Ilir Meta priti në një takim dy eurodeputetët Knut Fleckenstein dhe Eduard Kukan ku u diskutua për procesin e dekriminalizimit dhe Reformën në Drejtësi.
Ata dhanë një konferencë të përbashkët për mediat ku dy raporterët për Shqipërinë në parlmentin Evropian u shprehën optimist për rrugën e bërë deri tani për Reformën në Drejtësi, por duhet ende shumë për finalizimin e saj. Ata kërkuan nga politika shqiptare “t’i futen punës sapo të kemi rekomandimet përfundimtare të Venecias”.
“Mos harroni që në Parlamentin Evropian keni shumë miq”, tha erurodeputeti Kukan, duke shtuar se Shqipëria duhet të përmbushë kushtet për integrimin.
“Në fakt dëshiroj të them që synimi i vizitës sonë në Tiranë është shumë i thjeshtë, është transparent. Ne jemi këtu sepse jemi miq të Shqipërisë. Kemi ardhur për të takuar politikanët tuaj, për të parë se çfarë ndihme apo asistence mund të japim për anëtarësimin në Bashkimin Evropian. Kemi ardhur të dëgjojmë udhëheqësit tuaj, në mënyrë që të përpiqemi t’ju ndihmojmë për këtë reformë kaq të rëndësishme, e cila është e domosdoshme në mënyrë që Shqipëria të ecë përpara drejt anëtarësimit evropian. Jemi të kënaqur të shikojmë se reforma në drejtësi është në proces. Unë do të largohem nga Shqipëria optimist. Kemi optimizëm. Në fund të fundit është përgjegjësia e udhëheqësve tuaj politikanë që ta miratojnë reformën në drejtësi. Me vullnetin politik dhe angazhimin e të gjitha palëve do të arrihet synimi i përbashkët, në mënyrë që Shqipëria të ecë përpara drejt Bashkimit Evropian.”- tha Kukan.
Ndëkohë eurodeputeti Fleckenstein u fokusua kryesisht te dekrimnalizimi. Sipas tij më shumë sesa miratimi, ka rëndësi zbatimi i reformës.
“Ne kemi ardhur në Shqipëri pas miratimit të ligjiti të dekriminalizimit, që të krijojmë një panoramë se si mund të ndihmojmë vendin. Ne jemi të kënaqur me progresin e arritur deri më tani. Më duhet të them që na nevojitet një qasje që të zbatohen siç duhet reformat në vend. Jam i lumtur me gjërat që kam dëgjuar në takime, me Ramën, Bashën e Metën, të cilët na kanë bindur se ekziston dëshira për të gjetur një zgjidhje. Do shohim si mund të ndihmojmë Shqipërinë edhe pasi të vijnë konkluzionet e Venecias.Pas disa javësh do kemi mundësi të diskutojmë edhe raportin tim si raportues për Shqipërinë. Do ti rekomandoj komisionit që të monitorojë dhe ndjekë nga afër se çfarë po ndodh me zbatimin e reformës në drejtësi. Si mund të luftohet krimi dhe korrupsioni nëse nuk kemi një reformë të mirë në drejtësi. Nuk bëhet reforma për të kënaqur Merkelin, por për qytetarët”, tha Fleckenstein.
Kreu i Kuvendit, Ilir Meta, tha se përparimi i mëtejshëm në reformën në drejtësi është domosdoshmëri për të rritur në standard më të lartë luftën kundër korrupsionit dhe krimit të organizuar.
“Gjatë takimit që kemi patur edhe me me 3 nënkryetarët e kuvendit, kemi shkëmbyer mendime për reformat, ku në fokus ka qenë përparimi i mëtejshëm i reformës në drejtësi. E kemi theksuar jo si të nevojshme por të domosdoshme për luftën kundër korrupsionit e krimit të organizuar. Kemi diskutuar edhe ccëshjte të tjera në drejtim të integrimit evropian. Sfidat me të cilat ndeshen Parlamenti Evropian dhe Evropa janë shumë të mëdha. Kjo na shton më shumë përgjegjësinë për të rritur bashkëpunimin,” u shpreh Meta.
