Policia njoftoi ditën e djeshme se ka konstatuar mesazhe të maskuara si ato të kompanisë “Meta” drejt numrave të telefonit për konfirmimin e të dhënave në “Facebook”. Sipas policisë, në këto mesazhe pretendohet verifikimi i llogarive në “Facebook”, ose në të kundërt llogaria do të mbyllet.
Mirëpo, uniformat blu theksojnë se këto mesazhe kanë si synim orientimin e poseduesve të llogarive drejt linqeve mashtruese me qëllim marrjen në posedim të llogarive të personave në mënyrë të padrejtë.
Lidhur me këtë njoftim, gazetari i Klan News, Besar Bajraktaraj ka mësuar se pas këtyre mesazheve qëndrojnë një grup hakerash të huaj, të cilët ende nuk janë identifikuar.
Sipas të njëjtit burim, bëhet me dije se hakerat e huaj kanë dërguar mesazhe mashtrimi duke i kërkuar që të klikojnë në disa linqe të dyshimta. Kjo bëhet me qëllim që të vidhen adresa në “Facebook” që janë të lidhura me kartën e bankës për të bërë sponsorizime të bizneseve të tyre.
Nuk dihen se nga çili shtet janë hakerat, por numri që ata përdorin rezulton të jetë me prefiks nga Vietnami. Pasi ata arrinin që të merrnin të dhënat e profilit, më pas futeshin në llogarinë bankare duke transferuar shuma parash.
Sektori për Hetimin e Krimeve Kibernetike në DVP Tiranë gjatë monitorimit të vazhdueshëm të burimeve të hapura të informacionit dhe platformave virtuale, me qëllim evidentimin e veprimtarive të kundraligjshme kryesisht në fushën e krimeve kibernetike, ka konstatuar mesazhe të maskuara si ato të kompanisë Meta Platforms, drejt numrave të telefonit, për konfirmimin e të dhënave në rrjetin social Facebook, të lidhura me shërbimin Facebook Ads, (por jo vetëm).
Në këto mesazhe pretendohet verifikimi i llogarive në Facebook ose në të kundërt, llogaria do të mbyllet. Mesazhet mashtruese kanë si synim orientimin e poseduesve të llogarive drejt linqeve mashtruese me qëllim marrjen në posedim të llogarive të personave të mashtruar, në menyrë të padrejtë.
Sektori për Hetimin e Krimeve Kibernetike në DVP Tiranë bën thirrje që nqs jeni ose dyshoni se mund të jeni i prekur nga dërgimi i këtyre mesazheve, të paraqiteni pranë zyrave tona, si dhe këshillon që të mos kryeni asnjë veprim kundrejt këtyre mesazheve, të cilat mund të vijnë nga numra kryesisht të huaj.
/a.r
