Presidentja e Komisionit Europian, Ursula von der Leyen, ka folur për gazetarët pas takimit të zhvilluar me presidentin ukrainas Volodymyr Zelensky në selinë e Komisionit në Bruksel.
Siç citon “The Guardian”, ajo theksoi se qëndrimi i Evropës është se “kufijtë ndërkombëtarë nuk mund të ndryshohen me forcë”. Komenti vjen pas raportimeve se presidenti rus Vladimir Putin bëri kërkesa territoriale në takimin e tij me Donald Trump të premten.
“Këto janë vendime që duhen marrë vetëm nga Ukraina dhe Ukraina. Dhe këto vendime nuk mund të merren pa Ukrainën në tryezë”, shton ajo.
Von der Leyen u shpreh se Bashkimi Europian do të vazhdojë ta mbështesë Ukrainën pavarësisht kohëzgjatjes së konfliktit. Ajo theksoi sovranitetin dhe integritetin territorial të Ukrainës dhe shtoi se nuk duhet të ketë asnjë kufizim për forcat e saj të armatosura.
“BE-ja do të mbështesë Ukrainën për një ‘paqë të drejtë dhe të qëndrueshme’ për aq kohë sa të jetë e nevojshme. Ukraina është një vend sovran dhe duhet të jetë në gjendje të ruajë integritetin e saj territorial.”, tha presidentja e Komisionit Evropian.
Zelensky nga ana tjetër tha se është thelbësore që Europa të jetë “po aq e bashkuar tani” sa ishte kur filloi lufta në 2022, dhe se kjo do të ndihmojë që të arrihet “paqja e vërtetë”.
“Putini ka shumë kërkesa, por ne nuk i dimë të gjitha,” shton ai.
Ai thotë se do të marrë kohë për t’i shqyrtuar ato, por se është “e pamundur të bëhet kjo nën presionin e armëve”.
Zelensky shton se vijat aktuale të frontit në luftën e vendit të tij kundër Rusisë duhet të jenë baza për bisedimet e paqes. Po ashtu thotë se nevojitet një samit tripalësh mes Ukrainës, Rusisë dhe SHBA-ve, por Rusia nuk jep “asnjë shenjë” që kjo do të ndodhë.
“Dhe nëse Rusia refuzon, atëherë duhet të ndjekin sanksione të reja,” thotë ai.
Mes të tjerash presidenti ukrainas thotë se është mirënjohës ndaj Trump dhe SHBA-ve për dakordësinë për të punuar me Europën për t’i dhënë Ukrainës garanci sigurie, por se “nuk ka detaje se si do të funksionojë kjo”.
