Një vit pas njoftimit për një afrim me Kubën, presidenti amerikan, Barack Obama i kërkoi edhe një herë Kongresit, dominuar nga kundërshtarët republikanë, heqjen e embargos kundër ishullit komunist, vendosur nga Uashingtoni në vitin 1962.
“Kongresi mund të favorizojë një jetë më të mirë për popullin kubanez duke hequr një embargo që është trashëguar nga një politikë që ka dështuar”, theksoi Obama në një komunikatë të shkurtër.
Embargo vazhdon të ndalojë amerikanët të investojnë dhe të bëjnë turizëm në ishull dhe Uashingtoni kërcënon me gjoba të rënda ndërmarrjet që kanë degë në SHBA dhe që fillojnë ushtrimin e aktiviteteve të tyre në Kubë.
“Sot, flamuri amerikan valëvitet sërish në ambasadën tonë në Havanë. Sot, më shumë amerikanë shkojnë në Kubë dhe ata bashkëveprojnë me popullin kubanez si kurrë më parë gjatë 50 viteve të fundit”, shtoi Obama.
“Ne vazhdojmë të kemi mosmarrëveshje me qeverinë kubaneze, por duhet t’i diskutojmë këto probleme drejtpërdrejt me ata dhe të vazhdojmë të mbrojmë të drejtat e njeriut që ne i mbështesim në mbarë botën”, shtoi ai.