Paraditen e së hënës, Kombëtarja shqiptare është nisur drejt Strumicës, ku do të luajë ndeshjen e saj të radhës për kualifikueset e Botërorit 2018, me Maqedoninë.
UEFA ka përcaktuar suedezin Jonas Eriksson për të vendosur drejtësinë në fushën e lojës mes këtyre kombëtareve. Eriksson do të ndihmohet në këtë përballje të kuqezinjve, nga asistentët Mattias Klasenius dhe Daniel Ëarnmark, ndërkohë që gjyqtar i katërt do të jetë Andreas Ekberg.
43-vjeçari e ka nisur karrierën e tij si arbitër në vitin 1994, ndërkohë që në 2002-shin ai mori stemën e FIFA-s. Suedezi, që tashmë ka edhe famën e një multimilioneri, ka gjykuar shumë ndeshje të rëndësishme.
Në gusht të vitit 2013, ai arbitroi sfidën mes Chelsea dhe Bayern Munchen në Superkupën e Europës të atij viti, ndërsa në 2014-n ishte i pranishëm në Botërorin e Brazilit. Në 6 qershor të vitit 2015, Eriksson ishte arbitri i katërt i finales së Champions League, mes Barcelonës dhe Juventusit, të luajtur në Berlin.
Sfida mes Maqedonisë dhe Shqipërisë do të luhet mbrëmjen e së martës, në stadiumin “Mladost”, që ka një kapacitet prej 6.500 vendesh.
a.ç
