Pas kontrolleve në Sarandë e Delvinë për arrestimin e Kelment Balilit, policia i ka zhvendosur kërkimet në Gjirokastër dhe në zonat përreth.
Burime nga Policia thanë për Televizionin Klan se kontrollet janë kryer në disa banesa në qytetin e Gjirokastrës, si dhe në disa fshatra aty pranë, ku sipas policisë ka pasur informacione se i shumëkërkuari Kelment Balili kishte lidhje shoqërore.
Këto banesa janë kontrolluar edhe më parë nga njësitë operacionale të Policisë së Shtetit si dhe strukturat lokale. Dy ditë më parë, Njësitë operacionale të Policisë së Shtetit, shoqëruan në Drejtorinë e Policisë së Gjirokastrës së paku 11 pjesëtarë të familjes së Kelment Balilit dhe të njohur të tij, të cilët mësohet se nuk kanë dhënë detaje mbi vendosjen e Balilit.
Pas marrjes ne pyetje nga oficerë të Policisë, ata janë lënë të lirë. Që prej shpalljes në kërkim, policia ka kryer një sërë kërkimesh në disa hotele në pronësi të Balilit dhe në disa banesa në Stjarr të Delvinës e në Sarandë.
Për çështjen e Kelmend Balilit pritet të mblidhet Këshilli i Sigurisë Kombëtare i thirrur nga presidenti Nishani, pas shqetësimeve nga partnerët ndërkombëtarë dhe kreu i kuvendit Ilir Meta.
Për këtë çështje reagoi dhe ministri i brendshëm Saimir Tahiri, i cili tha se Balili i ka ditët e numëruara dhe shumë shpejt do të dalë para drejtësisë./a.k
