Dorëzimi i 300 byzylykëve elektronikë për monitorimin e të dënuarve u bë një ditë më parë në Ministrinë e Drejtësisë, ndërsa sot do të kryhej testimi i funksionimit të pajisjeve në prani të përfaqësuesve të kompanisë.
Ministria e Drejtësisë ka sqaruar përmes një deklarate për mediat se këtë të enjte nuk është paraqitur asnjë zyrtar i kompanisë.
“Në vijim të proçesit për marrjen nën ruajtje të byzylykëve elektronikë pranë Ministrisë së Drejtësisë, sot sipas proçesverbaleve të nënshkruara midis kompanisë dhe grupit të punës në Ministrinë e Drejtësisë, do te duhej të kryhej proçesi i verifikimit të funksionaliteteve të pajisjeve, me qëllim përfundimin e proçesit të marrjes së tyre në dorëzim. Fillimisht u ra dakord që proçesi sot të fillonte në orën 9.00. Përfaqesuesit e kompanisë nuk u paraqitën. Për këtë arsye, grupi i punës e njoftoi sërisht kompaninë që proçesi do fillonte në orën 16.00. Edhe në orarin e ri përfaqësuesit e kompanisë nuk u paraqitën”, thuhet në njoftim.
Gjithashtu, MD sqaron se grupi i punës ka vendosur që të bëjë testin e njërës prej pajisjeve për të parë funksionalitetin. Në varësi të këtij testimi, do të njoftohen edhe masat ligjore që do të marrë Ministria e Drejtësisë mbi këtë çështje. /b.d
