Bossi i mafies Totò Riina ka bërë të ditur përmes avokatit të tij Giovanni Anania, se do t’i përgjigjet pyetjeve të prokurorit dhe avokatëve në procesin për çështjen e marrëveshjes Shtet-Mafia në Itali. Komunikimi u bë në seancën e mbyllur, kur trupi gjykues ishte gati të linte sallën, raporton La Stampa.
Një kthesë e ngjarjeve që palët nuk e prisnin: është hera e parë në fakt që ‘Kumbari Korleonez” do t’i nënshtrohet pyetjeve duke sjellë ndoshta të reja të rëndësishme për procesin që përpiqet të hedhë dritë për një pakt mes bosëve të mafies dhe përfaqësuesve të institucioneve, shkruajnë mediat italiane.
Mes 10 të pandehurve të procesit, mafiozë të penduar si Giovanni Brusca, Massimo Ciancimino, ish-politikanëve si Marcello Dell’Utri dhe Nicola Mancino si dhe ish-zyrtarëve të skuadrës Ros të karabinierëve- vetëm kapo mafia e Corleones ka pranuar të përgjigjet në sallë.
Në përfundim të seancës ku u dhanë deponimet e dëshmitarëve të prokurorisë, kryetari i Gjykatës së Krimeve të Rënda, Alfredo Montalto, ka pyetur si pjesë formale e organizimit të punës, se cili në mesin e të akuzuarve ishte i gatshëm t’i nënshtrohet provimit. Riina, i lidhur me videokonferencë nga burgu në Parma, është kontaktuar në telefon nga avokati i tij dhe dha miratimin. Avokati ia komunikoi Kancelares, ndërsa procesi ishte mbyllur.
“Bosi” ashtu si të pandehurit e tjerë, me përjashtim të Mancinos dhe Cianciminos që akuzohen për: i pari për shpifje dhe bashkëpunim me mafien, i dyti për dëshmi të rreme; akuzohet për kërcënim të trupit politik të shtetit. Nuk është vendosur ende se kur do të mbahet seanca pyetëse. Ndërkohë që më 10 shkurt, ish-ministri i Brendshëm, Mancino do të bëjë deklarim spontan.
ma.me
